讀者Michael三月五日來電郵，重複二月二日電郵嘅要求，就係請梁玳寧小姐代傅會長講馬年犯太歲之事。其實本欄已喺二月十五號講咗，不便再講，今年屬鼠、馬、牛、雞都犯太歲，宜戴銀製羊牌避之、化之。
另一位讀者阿Paul三月四日來電郵，問買債券，保羅持八萬美元現金，每月收入一萬美元，想作穩健性投資及賺取比銀行利息高嘅合理回報。低息時代買債券，係唔少人嘅合理期望，可惜香港嘅債券市場唔發達，買債券唔似買股票咁容易，小戶想玩，實質上有兩個選擇，一個就係買債券基金，一個就係到銀行買按揭公司債券，分三年、五年期兩種，孳息率（扣除費用後）約三厘幾至四厘幾。
剛巧上星期六新城財經台有一個投資研討會，其中一位講者，所羅門美邦嘅私人客戶部董事總經理蘇偉生講低息時代嘅高息債券，佢指出經濟復甦期開始，高息債券（大多數係公司債券CorporateBonds）嘅回報率比較高，可能有八至十厘，但一定要買一籃子債券，以免碰上特殊風險。呢條橋本來好好，可惜如果你冇三十萬美元左右，在所羅門美邦開唔到戶口！揸住十萬元以下，蘇偉生話：「最方便嘅方法就係買高息債券基金！」有計啦，保羅，如果你要有較高回報率，又認為港元債券孳息唔滿意嘅，只能到銀行買債券基金咯。