邊個話靚仔先搵得多錢！好似南韓國家隊教練軒迪克咁，雖然佢俾某個英國網站選咗做至樣衰教練，但係咁又點喎，起碼佢搵錢搵得多，年薪重係中國國家隊教頭米路天奴域嘅三倍㖭。
南韓傳媒日前就報道，原來佢哋嘅荷蘭籍教頭軒迪克嘅人工，喺世界球壇排第三位，有成三百四十五萬美金一年；而排第一係英格蘭嘅艾歷臣，年薪有成四百三十五萬美金。至於我哋嘅國寶米路天奴域，原來每年只係逗得嗰百二萬美金，真係少得可憐。唔怪得米路要搏晒命搵銀，猛咁拍廣告（據講佢喺十強賽後兩個月撈咗成二千萬人民幣）。
朗拿度雖然成三個月冇比賽，但係巴西隊教練史高拉利「大菲」竟然重召佢入國家隊，踢本月二十七號對南斯拉夫場友賽，而我求大俠就覺得「大菲」擺明同國際米蘭玩嘢。雖則話朗拿度家陣已經冇傷，不過佢咁耐冇踢，邊有狀態踢月尾場波呢。咁即係話史高拉利分明迫國米盡快派佢落場踢，等佢慢慢「弗」番。
前巴西球王比利日前話，中國可以喺今屆世界盃決賽周，打入最後十六強。係人都知佢老人家有個烏鴉口，貼邊隊就香邊隊，睇怕中國應該冇運行。但係，計我求大俠話，比利家陣喺中國做緊宣傳推廣活動，點都要畀番幾分薄面，係咁意讚中國兩句，所以佢話今次睇好中國入十六強，未必係出自真心。廣大嘅中國球迷，唔使咁擔心。
禾達史密夫禮拜二俾愛華頓炒咗，睇嚟肥仔嘜加斯居尼唔走都唔得。事關肥仔嘜早排話到明，如果禾達史密夫俾愛華頓炒魷魚嘅話，佢就一於同禾達史密夫共同進退。正所為牙齒當金使，如果肥仔嘜繼續留喺愛華頓，咁咪好衰仔。但我求大俠就覺得，橫掂肥仔嘜近年都無心戀戰，加上都一把年紀（三十四歲），不如索性退休好過！
花名「細雞」嘅愉園翼鋒郭裕洪，佢太太前晚生咗個七磅幾嘅BB仔，求大俠喺度恭喜佢之餘，亦祝「細雞仔」快高長大。同「細雞」傾過，問佢初為人父有乜感覺時，「細雞」話開心同擔心都有，開心當然喺擁有自己嘅愛情結晶品，而擔心就驚第日湊仔時會搞到冇覺好瞓，影響踢波。