包玩包食：
復活節開派對小丑助興細路高興

在一眾成人計劃下個財政年度的預算時，小朋友的世界裏亦開始為三月尾四月頭的日子而作出部署：復活蛋、復活節卡、派對型服，甚至獻給父母大人的兒童節禮物清單，都逐一呈現在你面前。見到小朋友咁興奮迎節，大朋友們，都係時候放下沉重的工作，替這班百厭星搞個小朋友派對，搵埋小丑一齊玩，就大家都咁高興啦！
記者：莫麗嫦
攝影：陳盛臣
ImageKids：Javier、Jillian及小丑（創意小丑工作室）

雜錦壽司
西式為主的Cafe做起壽司來會否不倫不類？其實餐廳僱用了十位廚師，專門負責各式食品，簡單的壽司絕對難不倒日式料理師傅。壽司只有魚生欠奉，鰻魚、蟹柳、卷物等亦可做到，款式多少則要視乎包場人數而定。
試味報告：
壽司質素不遜於一般日式料理，若改為迷你型壽司會較迎合小朋友口胃。

焗吞拿魚薯茸
成年人的餐牌內多數將薯茸列為配菜，但需知薯仔本身有豐富的澱粉質、蛋白質、鈣、鐵、鉀和維他命，對成長中的小朋友絕對有益。入面加有粟米和吞拿魚，分量不多，只用來替薯茸調味。
試味報告：
焗後的薯茸面層有少許焦香，令淡口的薯茸變得香口；粟米和吞拿魚豐富了薯茸本身單調的味道。

迷你漢堡包
或者你會覺得餐廳自製的漢堡包不及大連鎖店做得咁出色美味，不過論營養價值及誠意，似乎後者欠奉。漢堡扒是師傅用鮮牛肉打成肉醬，加入洋葱蒜茸調味，唔講唔知傳統上漢堡扒中會加入用牛奶浸過的麵包，增加牛肉的黏性，漢堡扒又點止牛肉咁簡單。
試味報告：
漢堡扒做得香軟而有彈性，沒有甚麼酸瓜、茄醬亦不覺單調無味。

瑞士雞翼（上）
牛柳串燒（下）
一句“Sweet!”便從此令這甜味的雞翼稱為「瑞士雞翼」，與炸雞翼同列受小朋友歡迎的菜式；一串串的牛柳燒食時不須用餐具，年紀較小的小朋友亦可以拎起即食，十分方便。
試味報告：
瑞士雞翼賣相並不討好，但勝在味濃且帶甜味，最合細路仔口味；串燒牛肉肉質軟腍，切成小粒，方便小朋友放入口。

越式春卷
香口炸物永遠最能吸引小朋友，雖然多吃無益，但吃一兩件，家長還是可以接受吧！用越式米粉皮包着蝦米、芋頭及肉碎，炸香後米粉皮會變得鬆化，蘸甜酸汁同食更醒胃。
試味報告：
外表鬆化卻難避免有油膩感覺，而且餡料一般，少了惹味的材料配合。

朱古力慕思配士多啤梨雪糕
新鮮士多啤梨打成醬，配襯士多啤梨雪糕，已經夠晒吸引；上面還加入Brownie的朱古力慕思，重未完，頂層重有鮮忌廉、士多啤梨同碎果仁，小朋友當然難以抗拒，連大人都會忍唔住爭住食。
試味報告：
慕思用了略苦的朱古力製作，與較甜的Brownie配合味道就剛剛好，而且更有口感；底層的鮮士多啤梨醬的酸甜度控制得宜，非常醒胃。

店名：Cafe63
電話：23682628
地址：尖沙嘴北京道63號地庫
營業時間：上午7時半至午夜12時
付款方法：現金或信用卡(Visa，Master及Diners)
座位：約180個
價錢：以上派對套餐共10款食品，連汽水一杯，每位$80（三歲以下免費），十位起。如派對需間開獨立房間，則按時段設有最低消費，星期一至日下午3時至6時，每間間房（可容納約18人）每小時$500；星期日及一至四晚上6時至午夜12時，每間間房每小時$900；星期五及六晚上6時至午夜12時，每間間房每小時$1200。
表演預約：餐廳可代安排小丑表演，表演費用每小時收費約$1100-$1500（視乎表演項目而定）。