新劇《繾綣仙凡間》噚日喺電視城試造型，一班主要演員江華、楊思琦、盧海鵬、黃卓玲、呂珊都有出席，試完造型之後，成班演員就先後向大家介紹自己嘅角色，最後輪到鵬哥，怕且佢嫌之前嘅人講得太多，佢一手執住支咪，衝口而出就話：「講×完未！」鵬哥講完之後，全場人都靜晒，場面不知幾尷尬，跟住鵬哥再細細聲講一次：「講夠未呀！」
一班人尷尬完之後，就開始玩遊戲，魯振順行獨木橋，點知就樂極生悲，仆咗落地，重整損咗隻腳，成班記者就立即衝上前，點知佢話：「唔好影我啦！我冇事啦！」
有周刊噚日話鍾麗緹會喺九月同Band友男友阿Jon去泰國行婚禮，不過鍾麗緹噚日就全部否認，佢話其實當時有記者問佢係咪結婚，佢就話：「唔係，不過我講嘅嘢你哋都唔會寫，你哋鍾意點寫就點寫啦。」鍾麗緹話佢𠵱家同男友感情穩定，但就未諗過結婚，如果再婚一定會公開喎。
任葆琳最近成日同男友出雙入對，狀甚恩愛，真係羨煞旁人。任葆琳前晚就拖住男友去蒲蘭桂坊，佢同男友食完飯，之後約咗朋友喺蘭桂坊飲嘢傾偈，佢見到記者重好熱心咁問：「等Danielle呀？蒲咗三日，應該唔會出現啦！」睇嚟任葆琳對娛樂新聞都幾熟悉喎。
孫敬安早幾日喺卡拉OK飲醉咗，搞到好多事，噚日馮仁昭同佢通電話，佢話事發後應該要道歉嘅人，已經打晒電話，但佢就話未有同雷宇揚道過歉，因為佢話嗰晚同阿雷冇發生任何事，至於佢架車俾人淋天拿水，警方重查緊。而呢輪佢啱啱忙完張文慈做嘅鬼片，𠵱家又構思緊新戲。
無綫噚日警鐘突然間響起，但係所有人都好似冇乜反應，點知冇幾耐就好大陣仗，喺電視城大閘有兩架大型消防車同埋一架細消防車殺到，之後重有一隊無綫防火隊到場協助，點知虛驚一場。原來無綫警鐘間中都會響，原因就係無綫近山太大霧，所以影響到個警鐘誤鳴，先至搞到咁大陣仗。
劉青雲同太太郭藹明噚日出現機場，兩公婆啱啱喺法國巴黎度完假返港，二人嘅收穫都好豐富。青雲夫婦話記者好精神，重八卦問有冇其他藝人返嚟，青雲鬼馬咁同記者講：「如果我同第二個返嚟，你哋（指記者）重精神。」青雲身邊嘅太太郭藹明即笑笑口話：「你就想！」