昨日有3隻股票批股，結果3隻都大跌，明日國際（760）跌12%，佑威國際（627）跌13%，新奧燃氣（8149）跌12.6%。市底似乎轉弱，承接力唔多強。
跟住傳批股嘅，其中一隻就係高息股瑩輝集團（1163）。
記得1月份有人同小初講，話瑩輝帶證券界人士上東莞睇廠，股價由當時60仙升到𠵱家94仙，期間重一度升穿１元，而息率則有10厘咁多，相當吸引。
瑩輝將於下周二公布業績，據講盈利會維持，稍後會再相約證券界北上睇廠，如果反應理想嘅話，唔排除會順手批埋股，所以現階段會頂住股價，唔畀佢跌。
小初聽完有多少唔明，瑩輝上市兩年以來，幾乎賺幾多就派幾多，所以派息率好高，既然係咁，點解又要批股攞錢？會唔會係證券行見佢個勢好，想搵生意而幫佢批股呢？