天氣回暖、大地回春，又踏入攀山涉水嘅好時節，無論係登山初哥抑或係經驗豐富嘅專家，一般裝備如爬山鞋、背囊等都絕不能缺少，今次小記就八到一間專門發售登山露營用品的公司明天會搞開倉，今次開倉貨品全部二五折起，記得掃齊貨先好出發呀！
記者：許穗齡 攝影：楊錦文
ImageGirl：Chuling
登山屬帶危險性的運動，因此不少玩家都會以專業裝備上陣，好似呢款來自意大利的AKUTrail爬山鞋，就備受專業登山者追捧，皆因其鞋面採用GORE-TEX質料，防水又襟磨，鞋底則用上Vibram料，質地堅固又防跣，市面同等貨色的行山鞋，一般要賣成七百多元，現以$375就買到，必定成為各登山愛好者的頭號目標。
嫌一般行山鞋款式老土、顏色唔夠搶眼，不妨考慮呢款由TrekstaEvolutionMid出品的登山鞋，鞋面選用淺啡色的麖皮加透氣網面，襯埋鮮橙色的鞋帶，外形都唔錯，今次開倉只得斷碼貨，所以$200就買得到，絕對超值！
近年不少團體及學校均積極推廣攀石活動，有興趣入門的話不妨平平哋買對攀石鞋，呢款EBSwing嘅攀石鞋，鞋面用麖皮製，夠晒耐磨，而整個鞋身設計則以超貼腳為主，絕對符合攀石原則，開倉價二五折後只需$165，買對試吓都無妨。
魚網背囊曾經大熱一時，高峯期閒閒哋幾百蚊一個，𠵱家雖然無咁Hit，但係重幾受學生妹歡迎，可以當書包用，揹住嚟行山又更加通風涼快，$80一個絕對抵玩。
講牌子名氣，JanSport未必夠響，不過就以踏實、簡約見稱，其所出品嘅背囊就更為大眾受落，由阿叔到學生妹都愛用，今次呢隻翡翠綠色尼龍背囊以半價$120發售，必定成為倉中搶手貨。
行山始終係體力勞動，一年四季都難免出到一身汗，尤其初春天氣潮濕，焗汗好易發病。呢款由Mont-bell出品的T-shirt，以Wickron料製成，特點是吸汗而且快乾，最啱各位多汗的男士們穿着。
經常爬山兼露營的話，小記推介你買呢盞露營燈。手提露營燈以雙光管設計，可以選擇兩支光管同時使用以加強光源，亦可只選用一邊令電源更耐用，用6D電芯，一般四人營合用。
到戶外露營過夜，難免要齊齊玩吓煮飯仔，呢款用鈦金屬製的煮食套裝就最適合。套裝包括一大（1.9公升）一細（1.3公升）的煮食煲，𠵱家由原價$690冧價至$180開倉價發售，不過每款均一件起兩件止，合共約有20件，亦屬先到先得之貨色。
營幕屬較大件之裝備，一般售價都起碼過千，今次開倉就特別有少量營幕割價發售。呢款Walrus營幕可容納兩人，布料以半尼龍半聚脂合製而成，可防水及防紫外線，而重量只有約2公斤，𠵱家半價$500左右就有一個，要買就快手。
摺合尺碼：15cmx46cm
頂高：99cm
貨量：10
原價：$1,020
開倉價：$510
短程攀石或登山者未必會揹大背囊加重負擔，小小一個腰包盛載必需品如身分證或現金便足夠，這款就正是為輕便而設計的MoneyBelt，腰包就如一條皮帶般，容量足以裝薄薄的日常品，𠵱家$5有三個，絕對係平到笑。
日期：3月14至16日
3月21至23日
時間：星期四及五 11:00am-7:00pm
星期六 11:00am-5:00pm
地址：葵涌大連排道21-33號宏達工業中心10樓18室