市場又傳出有大戶沽港元買遠期美電，唔通港元又被狙擊？港府話如果唔控制開支，5年後財政儲備將會乾塘，屆時自然會影響聯繫滙率。到現時為止，港府與市場暫時都搵唔到帶動經濟復甦嘅龍頭，港元真係俾人狙擊都唔奇。
盈富基金（2800）下一季賣幾多，今日將有決定，市場現時估計可能回復120億元正常水平，或對大市構成壓力。
佑威（627）最近急升，噚日頂住喺0.72元全日高位收市，隨即以先舊後新方式配售1.2億股，每股作價0.69元，籌8000幾萬元。集資主要用作擴充生產線。
呢隻股由0.21元炒上嚟都係為咗配股，配完股後重有冇人維持秩序，實在考起阿虎。不過黑客話唔使驚，後市可能震一震，但震完可以再玩過。
齊翔食品（735）股權易手，董事局日前亦正式改組，股價噚日勁升22％作慶賀，成交1277萬元。
Cookie話呢個只係開始，目標價至少要見0.20元，然後可能會出現一連串注資行動。齊翔新股東喺國內主要從事地產及貿易業務，唔愁冇嘢注資。
中國人民銀行行長戴相龍開金口話，內地居民可用私己外滙投資港股，中資股即有起色，申銀萬國（218）勁升18.2%，第一上海（227）亦升16.3%。
不過ｉ師傅話，呢種升浪通常只會上升兩三日，即係重有兩日玩。