陳慧珊、蘇永康、汪琳同林敬剛等，噚日喺尖沙嘴美麗華酒店，宣傳下個禮拜一播映嘅無綫新劇《騎呢大狀》。眾演員喺現場即時比拼劏雞驗禽流感、綁蟹同紮辮，結果陳慧珊喺三樣比賽都表現得好出色。
陳慧珊用鉸剪剪開死雞檢驗內臟嗰陣，一啲都唔驚，重快手快腳，反而蘇永康就好驚，掂都唔敢掂隻死雞。陳慧珊話：「其實咁樣證明我係識煮餸，我最拿手嘅係麻婆豆腐，Ada（蔡少芬）都向我偷師，我平時食到啲好嘢，都會返屋企試吓煮。」
《騎呢大狀》將會緊接收視成績唔錯嘅《法網伊人》，不過陳慧珊同蘇永康都異口同聲話唔怕有壓力，陳慧珊話：「我以前拍嘅劇集《美味情緣》，收視都OK㗎。」
由黃百鳴揸fit嘅東方娛樂集團，下月將會大展拳腳，黃百鳴首先會將位於太子嘅寫字樓搬去灣仔嘅華懋世紀廣場，到時東方娛樂就會將沖印、電影同唱片部門，全部搬晒去灣仔總部，而黃百鳴計劃喺本月二十七號召開一個大型記者會，宣布佢嘅愛將、曾經喺《最佳拍檔》做「光頭仔」嘅王嘉明出碟進軍樂壇。
早排盛傳王菲同竇唯復合，其實係因為王菲新年期間去北京同竇唯見過面。馮仁昭聽聞竇唯得閒就搵吓啲舊愛，佢嘅前度女友姜昕同佢現任女友高原都幾老友，有時重三個人約埋一齊去打保齡㖭，不過趁高原打保齡嗰陣，竇唯竟然問姜昕重記唔記得佢哋以前啲嘢，姜昕雖然覺得愕然，但都好開心，證明竇唯呢招係得嘅。
陳奕迅爸爸陳裘大，日前去咗睇葉德嫻嘅尾場演唱會，咁啱呂少玲坐喺佢隔籬，於是就有人懷疑佢哋係相識。查實今次只係誤會一場，陳奕迅爸爸根本就唔識呂少玲，之前亦未見過。而呂少玲嗰晚睇葉德嫻演唱會其間，亦只係掛住猛咁傾電話！
馮仁昭有個朋友早兩日去UA金鐘戲院睇《有你終生美麗》，發現楊其龍同早排喺蘭桂坊一齊俾記者影到相嗰個外籍靚女，坐喺附近睇戲。本來拍拖睇戲好正常，但成套戲佢哋都不停喺度親熱，而且重咀到「啜啜」聲，嘈住隔籬啲人睇戲。