B老闆講起一啲幾有經驗、學歷嘅四十零歲失業行政人員，向佢求職，普遍減薪百分之五十，講到興奮，問左丁山：「如果我將全公司僱員都減百分之五十，咪慳番好多？」左丁山問：「你現在有冇錢賺？」B老闆話：「都算好，維持到盈利。」
左丁山話：「有錢賺嘅話，只係凍薪唔減薪，僱員唔敢嘈；減薪一成，佢哋會啞忍；減薪兩成，會暗中罵你無良；減薪五成，包你今年冇錢賺！表面上你可以慳番唔少，但大家谷氣之至，點會有生產力，分分鐘同你趕走客戶㖭。假如你乘機大換血，間運作良好嘅公司就進入比較混亂狀態，或者要一兩年先至重新整合。但假若到時經濟復甦，有能者唔抵得人工少，紛紛鬆人，你又要從頭嚟過，麻煩兼頭痛矣！」B老闆即刻話：「講吓笑啫，呢個係假設性討論！」
B老闆又問：「點解廣告業不景，美國啲電視台損失好多收益之時，佢哋仍然高薪挖角，例如ABC用三千萬美元向CBS搶DavidLetterman？」名藝員、名主持唔係一般僱員，佢哋如籃球明星、足球驕子，收嘅唔係薪水，而係「經濟租」（economicrent），呢啲人因為特殊才能（如Letterman嘅口才、幽默感、反應快）同埋因種種唔同嘅原因，累積咗大名氣，用李嘉圖（DavidRicardo，十九世紀經濟學家）嘅術語，擺咗自己喺一種「特殊優越位置」，可以收多啲錢。地舖喺「特殊優越位置」，可以收多好多租金（如旺角彌敦道，著名主持人亦一樣，Letterman就如彌敦道旺舖，只此一家，想租呀，畀多啲啦！