廣播處前處長張敏儀本月二十五日開始退休前放大假，大姐想唔做已好耐，不過老董盛情難卻，就答應多做三個月。
大大話話由七二年加入政府做節目主任起，大姐已經做咗三十年公僕，真係乜都夠晒皮。雖然唔記得佢創咗幾多個第一嘅紀錄，但佢肯定係第一個女新聞處處長（八五至八六年），又係第一個女廣播處處長（八六至九九年）。
公務員事務局局長王永平噚日重出稿親自稱讚呢位女同僚，話佢係過去三十年來盡忠職守，為香港廣播業嘅發展作出了重要貢獻；又話佢作為香港駐日嘅首席代表，對港日關係發揮了積極作用等……。嘩，咁高調祝大姐退休後生活愉快，平哥好似偏心啲，第日吳榮奎退休，唔知王永平會唔會咁講。
八方打長途電話去東京，點知接電話係把男聲，原來係冼老兄，大姐嘅新聞主任，佢話大姐唔得閒個別回電，一切已書面講晒。究竟大姐最後去邊八方都未打聽到，不過，早前阿董真係想請佢去做林D8個位，後來又offer佢做駐華盛頓貿易代表，聽講大姐都一一婉拒。
接替張大姐日本個位嘅係經濟局副局長方志偉，方先生文質彬彬，一定受日本人歡迎。
（圖）張大姐曾任廣播處處長，對香港廣播業貢獻良多。
E-mail：