北水南調，其實早已存在，但到目前為止，大多係透過「地下通道」而來，現時京官高調放風，支持內地人透過特許投資機構買港股嘅建議（QDII），他日時機成熟時，「北水」將可光明正大、搖旗吶喊般操入香港，再加上其他循不同途徑而來嘅大陸資金，擇肥而噬，大有大買，細有細炒，港股勢必再起風雲。
去年大陸資金南下，大手收集同路股，結果引發國企狂潮，估計當時入市的資金以百億元計。自此之後，大陸資金仍陸續有來，但買貨目標已唔限國企，開始玩其他股票，通常造一隻股票涉及金額以億元計。今次QDII一旦落實，以高盛初步估計，國家放行嘅資金最多可達50億至100億美元，但以內地嘅外滙存款約1900億美元計，相信最終批出的數額，應該不止100億美元之數。
噚日大市「徇眾要求」作出調整，但國企同紅籌則受QDII開綠燈消息刺激，全面報升，國企指數大升59點，升幅2.9%，以前大陸資金食到歸晒邊嘅股票，特別係較為冷門嘅，升勢亦最急。升得最勁嘅竟然係面臨清盤困擾嘅東北電（042），高收0.67元，大升19.6%；其他如洛陽玻璃（1108）同東方電機（1072）上升13%。
紅籌股以申銀萬國（218）同第一上海（227）升勢最勁，分別報高18.1%及16.3%。QDII一落實，同內地有密切關係嘅證券行，自然率先受惠。睇番歷史，去年國企股大升浪開始之時，申銀係首先彈出的一隻，幾日之內由0.4元升上1.45元水平，升幅3.6倍，今次申銀又急升，會否歷史重演，再次帶動另一個國企狂潮，留待事實證明。
嘉華國際（173）完成整固，噚日卒之發力，升上0.7元收市，升幅6%，可定下止賺位繼續持有。中建電訊（138）升破頸線出現後抽，正係低吸機會，短線仍以2.9元為目標。