如沒有《百萬富翁》、《智在必得》等派錢有獎遊戲節目，今日我們或仍不知，香港第一任港督是砵甸乍爵士；正如我們已經忘記「曾經滄海難為水」，下一句是「除卻巫山不是雲」一樣。
在《一筆OUT消》及《智在必得》贏過二十多萬的阿Jack，更表示：「玩遊戲可以交朋結友，又有錢攞。」雖然早前被無綫指摘封殺，但他仍與兩位好友，推出一本問答天書，教人攻陷這些遊戲。說不定，你亦可像他一樣，憑一百元的天書贏得一樣多的獎金。
一場玩家與電視台鬥法，正式開始。
記者：朱文俊
攝影：陳智良、陳穎（部分相片由被訪者提供）
自小已經對問答遊戲產生濃厚興趣的阿Jack、阿達及Lawrence，日常無事，便與朋友互相問答常識取樂。更一度埋怨有獎遊戲只供明星參加，直至《百萬富翁》的出現，令他們覺得三十多年的常識，終於有用武之地。於是他們聯手搞了個問答遊戲智囊團，專攻各大電視台的遊戲節目；而且一一勝出，以行動證明他們的常識豐富。但這個舉動卻令到電視台不滿，甚至公開指摘他們是職業觀眾。
對於指摘，阿Jack、阿達及Lawrence均異口同聲地反駁：「我覺得我哋只係專業觀眾，因為我哋每次上去玩遊戲，目標都非常清楚，就係要贏錢，而且我哋可以咁講，無論任何遊戲，玩到最後一局對住我哋，都好難贏過我哋。其他參賽者，玩遊戲之前，唔做定功課溫書，入嚟諗住參觀吓電視城，攞個鎖匙扣就走，然後下次又再參加過，嗰啲先叫做職業觀眾。
既然無綫講明封殺我哋，我哋就將原本圍內用嘅資料，編成一本問答天書（影印資料一叠），賣畀其他參賽者，遲吓結集成書，一於反抗到底。每份資料影印本賣$100元，Floppy版賣$50元，旨在將份資料推出去畀多啲人睇。」
對於今次電視台封殺他們，阿達坦言得多過失。他表示：「因為我哋全部都出過鏡贏過錢，根據參賽規則，半年內，唔可以喺其他電子傳媒亮相，無綫亦唔會畀我哋參賽，所以喺呢段時間，我哋根本無地方可以發揮，惟有變通一下，喺電視城門口賣天書，睇到其他人贏，都可以開心一下。」
天書銷售情況，阿達表示滿意：「做咗三個禮拜（共六日），就有五位數字收入，令到我哋信心增加唔少。」至於玩有獎遊戲必勝心得，據他們說，只是多看資料，沒有捷徑可走。
到電視城賣天書，阿Jack可說是主角，很多參加面試的人，見到他第一句便說：「你上次贏咗幾多錢？」話題因此便打開。
何太：唔夠名著資料
何太買了天書後，發覺有問題，便帶同參考書來與阿Jack研究：「噚晚出條題目話，以色列首都唔係耶路撒冷，係特拉維夫喎！」阿Jack立時回應：「以色列分裂咗幾個國家㗎，要睇條問題問邊面。」問到何太覺得這本天書，對參加遊戲節目有否幫助？她表示：「都幾好，不過世界名著資料似乎少啲。」阿Jack聞言惟有苦笑說：「冇可能將所有資料一次過做晒出嚟啫！」
伍先生：買嚟碰運氣
其他參加者亦有嫌$100元一份的資料太貴，表示要等到入圍才會買。其中伍先生便是一個例子。他邊歎氣邊說：「搵食艱難，邊度有錢搵咪試下，我冇乜強項，試吓運氣咋。」
阿達待伍先生走後說：「這種參加者，我們會勸佢唔好買呢份資料，因為如果佢對常識毫無概念，呢本天書根本幫唔到佢。」
姓名：李達祥（阿達）
年齡：38
學歷：工業學院畢業
現職：玩具檢定
強項：文科。
興趣：足球、睇書、睇報紙。
戰績：《一筆OUT消》第十一集，成為最後勝出者，贏取獎金$250,000元。
姓名：蘇建輝（Jack）
年齡：36
學歷：中五畢業
現職：玩具工程師
強項：中國歷史、地理，香港漫畫。
興趣：旅遊、睇書、睇報紙。
戰績：《一筆OUT消》第二集，成為最後勝出者，贏取獎金$178,000元。
《智在必得》第二集，被勝出者揀出幫助回答終極問題，分得$40,000元獎金，歷來共贏取$218,000元
姓名：顏偉聰（Lawrence）
年齡：38
學歷：理工大學
現職：保險經紀
強項：歷史、軍事、地理。
興趣：打麻雀、飲紅酒、睇報紙。
戰績：《一筆OUT消》第十四集，成為最後勝出者，贏取獎金$121,000元。
25/1/2002
無綫改例，參加該台遊戲節目後，半年內不能在任何電子傳媒亮相，阿Jack向無綫投訴。
30/1/2002
《智在必得》監製陳志球指阿Jack等為職業觀眾。
1/2/2002
阿Jack聯同朋友阿達，在電視城外派發售賣遊戲天書的宣傳單張。
22/2/2002
阿Jack的朋友譚偉文，被懷疑作弊遭當場取消資格。