喺最近舉行嘅日內瓦車展上，奧迪車廠展出咗多款新車，當中除有全新A4Cabriolet、A2及AllroadQuattro4.2外，同場亦展出咗全新嘅RS6四門版及旅行車版；當中RS6嘅四門版，更叫不少車迷為之讚歎不已㖭。
從相片中可以睇到，全新RS6四門版賣相極富跑味，除備有極具吸引力嘅車身線條外，全車包圍、18吋胎軨組合、雙出式尾喉及車尾定翼，全都將其高性能跑車形象徹底地展露出來。車廂鋪排方面，一雙Recaro桶形座椅，乘坐貼服舒適，而車內設備配搭亦見齊全，如恒溫冷氣及高級音響等等全部都有齊，使用時亦見方便；而三幅式跑車軚環把持感十足，轉向亦見輕盈㖭。不過最吸引嘅，都係此車嘅一台4.2公升V8biturbo偈，馬力輸出達450ps/5700-6400rpm，而扭力輸出更高達57.1kgm/1950-5500rpm，加上一套5前速Tiptronic半自動波箱及Quattro四驅系統嘅輔助，從而令新車可有不俗嘅性能表現。