趙飛雲呢輪成日都心神恍惚，可能係最近3次跑馬，連續3次3T中頭關，而其餘兩關都係中兩隻，搞到連炒股都冇心機，乜嘢都慢3拍。
好似前日咁，人行行長戴相龍話研究批准內地資金嚟香港炒股，趙飛雲居然當佢發噏風，噚日眼光光睇住啲中資股升，居然唔識得去追番啲，淨係尾市見到新地（016）抽番高，諗住佢成績表唔會差，先買咗1000股。
收市後，新地公布中期業績，符合市場預期，而且高層睇公司前景都幾樂觀，如果外圍美股唔係大散嘅話，今日應該重有得升。
噚晚暫時收起晒啲馬經，專心刨番隻中資股，發覺首都信息（8157）有啲睇頭，呢隻係真正嘅北京概念股，雖然現時離2008年奧運重好遙遠，但經常昅實會有着數。
首都信息自從上周升穿50日線（現處0.475元）後，走勢反覆向上，噚日浮回水面，反映前一段收集大致完成，日線圖呈現圓底形態，若升破0.54元，有機上試0.58元。0.50元附近可吸納，短炒0.47元止蝕。