港股噚日先跌後升，恒指收11318，升85點。恒指連升6日，唔肯回頭，搞到趙飛雲都有些少心驚，怕上唔到車。不過噚日期指大低水103點，加上成交縮至74億元，又令趙飛雲有番啲信心，等恒指回頭試50日線時先買貨。
新地（016）公布中期業績前企穩，微升0.25元，收61.50元。市場一般預期新地中期盈利倒退約4成，但看好下半年表現，因預期經濟復甦樓市轉好，加上有邊際利潤較高嘅禮頓山項目入帳。里昂給予新地「買入」評級，12個月目標價75元。如果新地業績如市場預期，估計股價向好機會較大。
技術上，新地10日線開始回升，其他技術指標亦支持反彈，短期阻力50日線62.90元，破位將確認升勢。由於港股短期或有調整，如果買入作中線持有，可候60元附近才買入。
太平協和（438）噚日復牌，消息對股價冇刺激作用，有人失望沽貨離場，股價跌穿20日線（現處0.70元），收0.69元，但成交唔算大，如守穩50日線0.67元，仍可持貨觀望，否則先計數離場。