世界盃重有兩個月就殺埋身，各類精品已經蜂擁而至，之前LEGO出嘅足球系列賣個滿堂紅，今次同adidas合作推出世界盃LEGO，有齊大球場、攻防練習、射門訓練等，而且更加插鏟波新玩法，最厲害係率先採用adidas世界盃足球。無論你係球迷定係LEGO迷都一定鍾意，產品未有得買住，𠵱家就等我哋搶先介紹畀大家睇。
記者：張穎倫 攝影：陳盛臣
決賽場館新增好玩鏟球
呢個決賽場館可踢真正11人賽，有齊守門員、後、中場隊員和前鋒等，規模龐大。配件方面又有埋計分牌、廣告牌同adidas世界盃足球，像真度極高。至正係新加鏟球玩法，每邊都設有兩位後防球員，可進行鏟球同大腳交波，好玩度大增。
世界盃未開始，你就可以率先鏟吓世界盃足球，可以自己控制球員向左向右鏟波，大大考驗玩家反應。
每套除咗有三個足球之外，計分牌和廣告牌更做得非常逼真。
攻防練習大手掌
一次過畀你玩齊射龍門同守龍門，射波時有發球器幫你手，守門員就有大手掌負責擋波。一攻一守，考你眼界和反應，兩個人互相攻守又得，一大班朋友輪住射龍門亦得。
守門員有大手掌幫助，射手嗰邊都唔弱，每次射門都有發球器將波放出，傳到射手腳下便可即時發射，動作一氣呵成。
唔好以為控制守門員只係撥左撥右咁簡單，其實係要用手指將絞輪推前推後先可以令守門員飛身擋波，玩法夠晒特別。
目標練習用力要準
要踢得好，射門、交波都同樣重要，所以呢個目標練習可以畀你自設交波或射門距離，唔同高度、角度更有埋5、10、25三個計分選擇。要射死角定餵個靚波，全部一次過練齊，對訓練你嘅力度同命中率都極有幫助。
練得準又夠大力，隨時一次過射穿10分同25分都得，夠晒型仔。
三人場夠刺激
雖然呢套三人場，冇11人嘅決賽場館咁宏偉，但論刺激就不相伯仲。事關場地細，四邊又有廣告牌圍住，個波可以不停喺場內反彈，球來球往速度高，反應慢少少就隨時俾對手搶波再起腳都未知。而且呢個細球場亦可以買多幾套，慢慢擴建變成大球場，靈活度更高。
因場地細，隨時有人釘人嘅情況，各球員話咁易就起腳射門，呢類飛身撲救嘅場面可謂屢見不鮮，睇遲半秒都輸波。
考眼界練射門
想練吓射波準唔準，就要試吓呢個目標練習，射過得分環就可以取得分數，分為5、10、20三個得分難度。之後更有守門員把守，小記玩過最多都得10分，要射過晒所有目標，真係少啲眼界都唔得。練成的話每次射十二碼同罰球都無往而不利。
LEGO-adidas球賽盃加展覽
如果你已經練得一身好球技的話，就可以參加喺3月29日至4月1日舉行嘅足球賽，只要你年滿7歲就可以即場免費報名，贏咗更可以獲得LEGO同adidas嘅豐富獎品。另外，同場更舉行「樂高動感繽紛SHOW」，以多個不同主題場館展出多款受歡迎的LEGO，好似「星戰傳奇」、「恐龍探險地帶」等，更有香港首次出現嘅8呎趣怪樂高塔，啱晒一家大細玩。
活動：樂高動感繽紛SHOW
地點：太古城中心地下至三樓
日期：3月29日至4月7日
時間：12:00noon-8:00pm
地址：港島東太古灣道18號
售賣點：
玩具反斗城（27309462）尖沙嘴海運大廈地庫032號舖
吉之島（28846888）鰂魚涌康怡廣場南座地下