八方噚日喺《國際先驅論壇報》個網站度睇到一段報道，話雖然𠵱家香港經濟不景，搞到百業蕭條，但惟獨賣女性內衣褲嘅店舖生意，竟然可以逆市上升，理由就係因為本港女性對於胸圍底褲愈來愈講究。雖然內衣褲着咗上身行出街都唔會有人睇到，但係對自己好啲，揀番個又靚又着得舒服嘅胸圍，自信心同自我形象都當堂高晒啦！
報道又話，一向買胸圍都鍾意揀啲密實而款式平凡嘅本港女性，可能受到某啲歐洲大牌子影響，似乎開始大膽咗起嚟。
胸圍款式方面，後生女除咗鍾意運動型胸圍之外，有複雜喱士設計嘅，少少性感，又女性化嘅款式都啱佢哋心水。顏色方面就重創新，愈來愈多人買綠、紫同粉紅色等鮮色嘅內衣褲，平時最好賣嘅黑、白同肉色系列，可能慢慢就會被取代。
而農曆新年期間就最多人買紅色同粉紅色嘅胸圍來應應節。各位唔知又有冇興趣買番個特別款式嘅胸圍嚟改變吓形象呢？
（圖）原來女人錢真係咁易賺，女士內衣生意竟然喺逆市上升。
E-mail：