將軍澳中心噚晚內購，全城矚目，各大代理行都派駐重兵，美聯後勤部門，包括企業傳訊部、法律部、研究部等，都派人到場支援，由於受條例所限，都係精神上支持為主，順便考察吓，一啲涉及同代理無關嘅嘢，就可以幫吓手。不過，原來美聯後勤員工有啲都有代理牌，可以隨時落場客串。
內地企業萬泰集團位於上海嘅豪宅物業，上海光明城市，即將來港展銷，該公司多名高層要員更親身來港，明日為樓盤做推介，同埋講吓未來動向。上海光明城市曾獲2002年上海建設獎、全國人居科技進步金獎、上海優秀房型獎，同上海住宅科技獎。大家可能對佢嘅背景唔係好熟悉，唔知佢有幾大。不過，若果話畀你知，佢持有本港新萬泰控股（433）、明珠興業（988），同埋內地上市公司松遼控股（600715），睇法會唔會有改觀呢？
近一年發展商除咗用獎金，鼓勵代理努力搵客之外，好鍾意搞吓頒獎禮，嘉華地產嘅九龍塘嘉豪軒，就啱啱頒咗張獎狀畀利嘉閣地產，表揚佢成績好。利記近期積極開新舖，今日就會響藍田滙景廣場開分行，呢間分行響中記對面，上手係時裝店。
一手盤已成為代理嘅主要收入來源，所以代理都搏命搶奪市場佔有率，聽講中原地產做北角縉景臺，攞到差唔多七八成佔有率，所以副營業董事何偉強，同營業董事唐秉正，今晚響灣仔會展嘅「天上人間」舉行祝捷會，實行請同事食餐勁。
蘭西