我求大俠一向都好欣賞拉素嘅意大利國腳尼斯達，佢被譽為世界最佳後衞之一，踢法瀟灑到暈，不過前晚睇到佢對羅馬嗰場意甲聯嘅，就認真眼冤，拉素所失五球之中，有三球都係輸佢，難怪佢喺賽後要立即向球迷公開道歉。
究竟點解尼斯達表現咁差呢？我求大俠就聽到幾個唔同嘅版本，不過始終都係多得曼聯領隊費格遜。話說「老費」諗住季尾以二千五百萬鎊買尼斯達，所以專程到羅馬捧佢場，喺咁大壓力下，結果搞到尼斯達腳仔軟；亦有人話尼斯達見到拉素隊友史譚當日喺曼聯嘅悲慘遭遇，根本唔想加盟「紅魔鬼」，所以咪特登踢得咁差囉！
𠵱家不時有人話足球比賽太密，直播嘅賽事太多，搞到球迷睇到好膩；原來唔止係球迷，連球員都睇到厭。好似拜仁龍門簡尼咁，雖然佢哋要喺聽日嘅歐冠盃大戰曼聯，不過佢就話連紅魔嘅錄影帶未睇過，佢話：「𠵱家啲賽事實在太多嘞，就連睇敵對球隊嘅戰術錄影帶，我都頂唔順！」
國足隊隊長范志毅喺球場上係英雄，不過喺球場外就做咗狗熊。據講中遠對申花場甲A開鑼戰後，佢揸車送嚟捧場嘅蘇格蘭鄧地職員返酒店時，喺周家嘴路口有架車突然cut線，范大將軍及時煞車，先至冇釀成交通意外。不過佢就好㷫，落車同嗰架車嘅司機理論，其間重有人旭埋手㖭，搞到個司機報警同埋去醫院驗傷，件事可能重有下文。其實件事細微細眼，但范大將軍都冇理由郁手咁有失身分。
我求大俠係傳媒界人，但有時行家嘅報道又真係幾吹水。噚日就有報道話狂人拉登喺九八世界盃英格蘭對突尼西亞嘅分組賽，曾想用手槍同埋手榴彈殺死英格蘭領隊荷杜，同埋球星碧咸、奧雲、舒利亞。報道重話拉登雖然係阿仙奴球迷，不過為咗「理想」都要「大義滅親」，連阿仙奴龍門施文都要殺埋！咁嘅報道，你話吹水唔吹水喇？唔通拉登會出嚟否認咩！
愛華頓喺禮拜日場足總盃半準決賽俾米杜士堡炒咗三蛋出局後，領隊禾達史密夫就話要叠埋心水護級，重叫球會揼水買球員。禾達史密夫咁講好似好有道理，但係人都知愛華頓財政好唔掂，身為領隊嘅禾達史密夫冇理由唔知，佢咁講唔通係驚自己領導無方，想轉移球迷嘅視線？