滿城皆說減薪，究竟政府如何減、幾時減，大家木宰羊。總之如果係政府或公營機構嘅合約員工，碰啱今個月或下個月合約期滿而又會續約嘅，會非常惆悵。一位朋友嘅朋友在公營機構打工，表現極其良好，上司賞識，正預備續約，點知一聲令下，加薪一定無望，減薪大有可能，因為佢上司都唔知點樣處理，惟有靜候上頭發落。
照理減薪一刀切，最傷、最影響全力工作、力求表現嘅好員工，但又係最容易執行嘅辦法，啲懶鬼人力資源經理最高興。假如呢次松哥減薪係一刀切，唔係某些懶人減多啲、某些好人可以加少少嘅話，以後一定係營造一種做又三十六、唔做又三十六嘅文化，拉低生產力。
中環街頭碰到Ｋ老闆，講起減薪，Ｋ老闆話：「唏，有乜稀奇，嚟我處見工做MarketingDirector嘅人，好多收開七萬至八萬銀一個月，我問佢哋要求多少人工，個個自動減薪，一啲話兩三萬肯制，一啲話要四、五萬；老實講，減到兩三萬嗰啲，我驚佢有問題，所以我請咗自動減薪五十巴仙嗰位，畀番四萬銀一個月，你話我有冇良心？」有之至，肯用四萬銀一個月請人，今時今日梗係有良心啦，啲公僕如果嫌人工低，大可辭工投身私人機構，睇吓點？
所謂打擊士氣喎，做番《獅子山下》高魯泉時代嘅角色，就最有士氣。