兩儀科技（094）１月底以先舊後新方式配售2.7億股，每股作價0.05元，經過個多月收集後，幕後開始發難，股價上周最高升至0.084元，噚日再炒高，但升至0.094元就開始派貨，收報0.089元，成交1566萬元。黑客話，幕後重未派完貨，可能重要炒高，散多一次貨。
科聯系統（046）最近發出盈利警告，不過股價都冇咩點跌，噚日重反彈13.5％，有啲反常。
Cookie話，雖然去年公司業績唔多理想，但主要係因為一次性撥備居多，而經營業務嘅邊際利潤收窄，基本上係大勢所趨，冇邊個可以倖免，市場又傳出該公司最近接到大訂單，加上科聯已進軍國內市場，對芬佬具一定吸引力。
美國經濟復甦，理應利好利豐（494），但噚日升得最勁係科技股而非貿易股。據聞，中國入世後，外地買家會直接向國內廠商訂貨，對中間人嘅依賴程度減低。
因此，即使美國復甦，利豐嘅生意都可能因為中國入世而受損。況且，最近美國零售數據造好，主要係因為折扣超市銷售勁升，可惜利豐冇呢個層面嘅客戶。如果利豐生意持續轉弱，可能會被外資大行調低評級。
上周累積乾升1.14倍嘅數通（8030），噚日終於回吐12.6％。據ｉ師傅話，此股基本上已歸邊，街外冇邊個有貨可以質低佢，不過由於升得多，引起看門狗注意，因此點都要扮腳軟，當係畀面。