昨日經紀陳介紹位朋友畀小初認識，原來係位來自大陸專炒A股嘅大戶，但同時有喺香港炒吓股，聽講落盤金額唔細，真係失敬失敬。
同呢位大哥傾開，佢話大陸同香港嘅炒股界真係愈來愈密切．好似佢有班上海老友咁，就將隻精優藥業（858），由唔夠20仙炒到上去最高52仙。不過，佢哋近幾個月來喺A股市場損手，令精優股價唔上唔落，喺40仙水平橫行。
呢位大哥又話，佢呢班老友被A股市場鎖住唔少資金，所以好想炒起隻精優套現班師回朝，因此同一班香港炒股精英商討合作，但唔知點解，傾咗好一段時間都未見有着落，或者係價錢上未能取得共識。
小初終於明白，唔怪得市場成日傳言精優有得炒，但一直都只見身郁，唔見米白，原來根本未講掂數。
大哥重話，雖然噚日精優升咗3.57％，收43.5仙，但睇嚟都係虛火居多，稍後真正嚟料實會通知小初咁講。