港姐楊思琦、鍾沛枝、朱凱婷、劉桂櫻同藝員姚嘉妮，噚日喺維多利亞公園，為香港花卉展覽「萬紫千紅喜迎賓」攝影比賽嘅參賽者做模特兒。而一班攝影發燒友，似乎對姚嘉妮特別感興趣，圍住佢係咁影。
被無綫力捧嘅楊思琦，會喺新劇《繾綣仙凡間》擔任女主角，噚日佢初試造型，佢話：「我呢套劇重會同江華、樊少皇合作。」
問到楊思琦知否自己受無綫力捧，令郭羨妮妒忌？佢就話唔知道，並話：「我會做好自己，唔會用妒忌眼光睇人，我都有睇過佢套《尋秦記》，做得幾自然吖。」
無綫即將開拍嘅重頭劇《帝女花》，已經宣布咗由馬浚偉（馬仔）擔任男主角。佢自從拍完《勇往直前》之後，一直得無綫製作總監曾勵珍照住。原來馬仔呢啲機會，原本係屬於張智霖（Chilam）。Chilam自從拍完《十月初五的月光》後人氣反彈，珍姐即刻叫Chilam同無綫簽藝員約，力捧佢做無綫小生。點知Chilam見自己個勢好，就寧願接電影拍都唔想簽畀無綫，珍姐見佢唔肯乖乖就範，所以轉軚捧馬仔，就係咁，Chilam原本喺無綫嘅前途就咁讓咗畀馬仔。
張學友噚日喺機場出現，佢之前接受咗商台節目《茶煲裏的查篤撑》嘅電話訪問，問到學友憑新戲《男人四十》獲提名香港電影金像獎嘅「最佳男主角」心情如何，學友話：「我冇乜信心，另外幾位提名男主角嘅戲種好唔同。」學友又話佢為咗揣摩《男》片入面嘅中年教師角色，專登去學校度睇下啲阿sir點上堂教書。
胡杏兒有份主演嘅劇集《法網伊人》收視節節上升，上周平均收視達三十四點（約218萬觀眾）。早前劇中主角李克勤曾話過如收視達到三十五點（約224萬觀眾），會請大家食翅，胡杏兒噚日喺電視城話：「收視咁好，係唔係都會屈克勤請食翅，鬼叫佢之前講過咩，加上佢演唱會又賺咁多錢！」
王賢誌噚日去葵涌石籬二邨，出席以母親命名嘅王胡麗明幼稚園開幕禮，爸爸王忠桐、媽媽王胡麗明都有出席。
王賢誌話：「呢間幼稚園係爸爸同媽媽一齊捐款而建，至於捐咗幾多錢，就唔方便講啦。其實用邊個名命名，對佢哋嚟講都冇所謂。」
高志森早排拍嘅電視劇《伴我同行》，近日喺亞視播出，噚日佢接受商台節目《茶煲裏的查篤撑》訪問時，大吐苦水話亞視冇幫佢套劇做宣傳。高志森話：「我已經成日嘈話點解冇宣傳，黎文卓（亞視宣傳總監）都俾我搓圓㩒扁，好彩𠵱家啲宣傳好咗啲。」