早排一堆MD機玩跌價，搞到MP3Player冇啖好食，好多腦場都唔敢入貨。今時今日推出MP3新機，再用錄音、收音作招徠已經唔掂。韓國生產商Kscom為MP3Player注入新概念，能將機內音樂以FM頻道發射，只要校啱頻道，即可收聽，搖身一變成為一個迷你私人MP3電台，播咩歌自己話晒事。
記者、攝影：徐影龍
ImageGirl：Natalie
Kscom呢部MPGIO最大特色係只要加個FM發射器，再校好收音機頻道，就可以收聽機內MP3音樂，即時建立一個屬於自己嘅FM電台，最適合係車內欣賞MP3歌曲，司機只需調校好頻道便可收聽，毋須再花錢裝配汽車專用MP3機。即使去朋友屋企開Party，亦可將自己部MPGIO作FM電台，包你朋友都覺得新奇。
筆者以兩方面作實地測試呢部MPGIO，第一係FM訊號發射距離，發覺並非好遠，大概超過一米便出現接收不清情況。第二係音色，若距離及頻道適當，音色亦算不俗。若接收仍有問題的話，可嘗試轉換發射頻道，MPGIO一共提供四個發射頻道，只需一按便可輕易轉換。
MPGIO亦備有錄音功能，可即時錄下現場聲音。以機內預設之64MB記憶體為例，約可錄低超過五小時聲音，適合上課、會議或訪問時作備忘之用。唯一要彈係只可靠機上之細小Mic收音，需要放得好近先可以錄到理想聲音，否則只會被現場嘈雜聲音蓋過。
值得一提係錄音隔鄰之JoyStick形功能掣，除四個方向控制音量及搜曲外，重可向下壓，作重播及暫停之用，功能類似SONY嘅JogDial旋轉掣，令用家在操作上感到十分之方便。機身採用專用鋰電池，不過播放時間長達八小時，搭長途車或出外旅行用尚算足夠。
大部分嘅MP3Player生產商，往往忽略音質，跟機耳筒多數不濟。MPGIO就令筆者有意外驚喜，除咗個線控耳筒設計得頗討好外，音質亦比其他機種優勝，尤其係低音部分表現，若配合預設嘅五個音場選擇，MP3都可以有超越CD同MD嘅質素。為遷就機身纖巧設計，MPGIO除基本按掣及插頭外，便甚麼也沒有，而LCD屏幕則移至線控耳筒上，雖然屏幕尺寸夠大，不過不支援中文內碼，中文歌名會出現亂碼情形。
跟機附送一個《MPgio》管理軟件，可即時播放各式音樂檔案和下載歌曲至MPGIO，軟件介面可以「簡單」形容；設計簡單、操作簡單、功能亦算簡單，並不提供製作MP3功能，想將CD轉做MP3就要另裝軟件。《MPgio》除MP3音樂檔案之外，重支援所有電腦File，用家可將各式各樣檔案，下載至MPGIO作資料暫存，再攜帶出街。由於MPGIO最大支援192MB記憶體，就算圖文並茂嘅《PowerPoint》檔案或影像檔案，都可以MPGIO儲存。
MPGIO規格表：
基本功能：播放MP3
其他功能：FM廣播、五小時錄音
內置記憶體：64MB
擴充卡：MMC（最大支援192MB）
電池：專用鋰電池
耗電量：八小時
尺寸：81(H)ｘ53(W)ｘ15.6(D)mm
重量：43g（連電池）
香港代理：LOGTEK
查詢電話：23319493
$1,280
記者意見：
抵讚：FM廣播輕易為有車人士提供MP3音樂享受，機身設計及音色亦值得一讚。
要彈：FM發射器不是內置機身，前後搜曲反應較遲鈍。