四川食肆大家都唔難搵到，但要搵專營四川食品嘅雜貨店，香港則少之又少。如果大家有興趣買正宗四川食品，小記都有門路，由四川大廚邵德龍介紹下，搵到呢間唔太起眼嘅四川辦館，位於荃灣區，主要做批發，而且位於工業中心內，唔係熟客仔真係未必搵到。負責人Carman話都會做零售，買多與少悉隨尊便。另外，想試吓正宗四川火鍋，可以喺裏面搵齊用料㗎！
記者：陳冰麗
攝影：關文慧
老干媽喺四川係一個出名嘅品牌，超過十年歷史。豆豉醬最適合素食者，用料有大豆、辣椒、花椒等，味香帶少辣，可以用作炒菜、撈麵、做火鍋等。而牛肉椒則同樣帶辣，有牛肉，芝麻及花生，食落零舍香。至於豆豉魚則有豆豉同鯪魚，佢比起超市搵到嘅豆豉鯪魚香同實。
講到四川食品又點少得辣椒粉，左方嘅係泡辣椒，以比較大隻嘅海椒加辣油浸製而成，中辣，多數用嚟配以鹹酸菜滾魚湯，喺食慾不振時最啱飲。至於中間嘅辣椒粉係用咗指天椒所磨成，係最辣嘅一種，嗜辣嘅話不妨以粉麵拌食。不過唔食得辣則最好揀右面嘅碎辣椒粉，辣味最輕。
由花椒粉做成嘅花椒油，麻麻辣辣，方便在於可以即開即用，可以用作蘸肉食，除咗細樽裝，亦有大支裝2500克供選擇，售$65。四川除咗盛產辣椒，原來芝麻亦好受歡迎，出產嘅芝麻油零舍香，大家可要試試。
正宗四川麻辣火鍋係辣而帶麻，當中材料必須有齊（由左至右）子彈椒、紅油、花椒、麻辣湯膽及貴州椒，有齊以上各料後就可以加入上湯一齊滾至出味，做其麻辣火鍋。四川麻辣火鍋最大特色係食完個口腔會feel到麻麻辣辣而唔似得食辣椒喺喉嚨辣到咳，主要就係加咗香而帶辣嘅花椒啦！
不過如果嫌要加咁多料麻煩，呢度亦有現成一包一包嘅火鍋湯料，都好方便㗎！
地址：荃灣德士古道168號德豐工業中心1座812室
電話：27703210
辦公時間：星期一至六 9am-6pm