中移動（941）再有進帳45仙，聯通（762）只微升1格，有機會追番上去。聯通實情有利好消息，就係旗下盈利最肥嘅上海聯通，舊年客戶150幾萬，已經翻一番，估計今年再增至250萬。聯通Call輪，要望多兩眼。
聯通Call輪10件，多數係溢價高、槓桿率普通，交投亦唔太活。最佳對象係9035，交投最活，有33球易手，現價22.1仙，溢價6.3%，槓桿率3.7倍；11月到期，咁嘅條件唔錯。交投第二活嘅9022，有21球易手，壽命長多4個月，槓桿率大少少，不過溢價高3.8個百分點，9035自然靚過呢件，一於揀9035埋手。
中石化（386）發出盈利警告，話舊年盈利因為油價下跌，冇法達到發行A股時所作盈利預測，股價跌4仙。
中石化跌後好快反彈，原因係PE仍低，基金唔多理會業績，可以趁低收集中石化Call輪9062。
9062明年1月到期，現價31仙，有4倍槓桿率，而溢價得1.1%。同類輪9227，壽命同槓桿率靚啲，但溢價去到20%，冇9062咁正。