長實(001)呢排主力催谷長沙灣泓景臺，昨日更傳出小超李澤鉅會親自到紅磡售樓處視察，一眾記者當然不敢怠慢，一早到場等候，而執行董事趙國雄亦承認會與小超一齊去睇紅磡國際都會，之後同九鐵搞招標事宜。
趙生同行家傾咗一輪，攞部手電出嚟打，臨行開前仲叫同事黃思聰繼續答行家問題，大家諗住佢一陣就返嚟，點知等咗好耐都唔見人，打探之下，原來趙生已畀小超call走咗。據講小超原來一聽到有好多記者響售樓處，即刻掉頭走人。一眾行家就錯失咗一個採訪機會。不過，長實今個月公布業績，就算小超肯現身，都唔可以講啲敏感問題。
本港嘅機鐵沿線有為旅客提供預辦登機手續服務，港龍航空響四川成都，最近都推出首個市區預辦登機手續服務，因為港龍擴充當地辦事處，遷入長實嘅天府喜來登飯店。
上海樓市熾熱，香港理工大學網上學府，最近同上海華東師範大學商學院，合辦「中國房地產研究」碩士學位課程，今個禮拜重會舉行講座，由上海市房地產經紀人協會理事談洪，講講內地房地產嘅最新發展形勢。睇嚟有心響上海搞房地產嘅公司，都要聽聽，攞番啲最新資料做參考。
蘭西