「眯埋雙眼數波波，如要數齊有千萬個……」憑着唱《數波波》等通俗流行曲成名的尹光，今年將有很多新搞作，除月尾在文化中心開四場演唱會外，他還打算改變歌路學人Rap歌，計劃在年中推出可以令人聽得Fing腦搖頭的勁歌熱舞大碟，主打內陸市場。這個五十多歲的大男人話要唱Rap，你估會點呢……
記者：曾順珍
攝影：楊錦文
但可能歌詞得意過癮關係，尹光二十多年來都擁有年輕擁躉，他說最近中大有班學生請他去唱歌，因為反應太熱烈，令他自覺十足似四大天王咁款，又開心又興奮。就因為有年輕捧場客，居然有間製作公司叫他Rap歌，還幫他寫歌詞和作曲，主攻大陸D場。
「呢，嗰啲可以用來Fing頭嘅歌呢，唱唔似唱，講唔似講嗰啲呢，𠵱家重寫緊歌，應該會用部分我嘅舊歌，好似、《雪姑七友》、《荷里活》咁，再配上可以跳舞嘅新潮音樂推出，我相信會係唱吓國語又講吓嘢咁，如果成事嘅話，應該會喺年中推出。」
問他何時識Rap歌，他坦言自己對此一竅不通。
「我都有問過點解搵我Rap歌，因為我都一把年紀啦，點知佢哋話我適合喎，咁既然佢哋夠膽出錢叫我唱，我咪做囉……我唔識Rap㗎，但係大戲中有樣叫數白欖，都好似講嘢咁，我咪一於當數白欖咁數之嘛，對我唔算係難度。」尹光蠻有信心地說。
不擔心歌迷難接受新形象嗎？
「唔擔心，因為我做事向來隨緣，當年張耀榮搵我開演唱會，就係因為有場地多咗出嚟，而佢又想搵我去玩吓，點知結果會咁好反應啫。」
樂而不淫
尹光這陣子很忙，因為要為月尾的演唱會勤於練習，今次他在文化中心開兩場粵語流行曲和兩場粵曲演唱會，他話情況比預期理想，因為賣了十日飛，已售去一半，相信今次會賣個滿堂紅。
「今次係我第五次喺文化中心開演唱會，不過就係我第一次着晒戲服有埋做手唱大戲，重有我搵埋呢個大陸新拍檔李淑勤一齊做，佢對眼好大好靚女㗎……」提起唱大戲，尹光會說個不停，因為佢話自己本身就是粵曲的狂熱分子。除了粵曲外，也會唱拿手好戲──通俗抵死諧趣歌，「雪姑七友七個小矮人……」、「荷里活有間大酒店，三個肥婆學踢波……」等一定不能少，因為有市場兼有捧場客。
坊間傳言，尹光一向都有江湖人物做Fans，不少蠱惑仔都因為尹光開Show，特地使人到文化中心撲飛欣賞。
「呢個我唔知喎，都唔出奇嘅，鍾意聽呢類歌嘅多數係後生仔，因為夠過癮又得意。我想澄清一下，好多人話我唱鹹濕歌，其實歌詞中邊有嘢係鹹濕呢？係啲人自己諗邪嘢，好似《數波波》咁，只不過係用首歌唱出唔同嘅波波，又好似『荷里活有間大酒店，三個肥婆學踢波』咁，根本就無一句說話係鹹濕，其實原本歌詞係『三個肥婆六個波』，呢啲就叫鹹濕，但都俾我改晒啦。」尹光還說自己從不講粗口，試過有導演要他在電影裏唱粗口歌，他堅決不唱也不拍。
繼續風光
唱時代曲唔難，唱Rap唔難，尹光認為唱大戲最難，因為又多歌詞歌譜要記，還要顧住做手表情，是以接觸了三十多年，他仍要不斷學習。
「我本身係越南人，十三歲就跟一個越南師傅學戲，精通小提琴、二胡、木琴、結他、夏威夷結他等。69年因為要逃兵役，所以偷渡過來香港，之後就靠唱歌維生。」
原來尹光出身自有錢世家，父親是兩間戲院和一個溜冰場的老闆，那時連芳艷芬、羅劍郎、何非凡、鳳凰女等大老倌都會受尹父邀請而過去唱戲。不過尹光逃避兵役後，越南好快發生政變，家裏所有財物被充公，變成一無所有。
「70年代唱粵曲根本搵唔到食，因為一年都開唔到一次班，於是惟有到夜總會唱粵語流行曲，那時一個月只得$200，徐小鳳都係同我同場咋。唱咗半年，又走去啟德遊樂場唱，每場只有$7。後來識咗鍾叮噹，佢介紹我入一間夜總會唱，一場Show錢有$400，我分$40，佢就袋$160……」跟住尹光把以前入行的經歷如數白欖般數來。
「我亦曾經唱過一啲警世歌，好似《追龍》、《出冊》等，好受蠱惑仔歡迎，所以做夜總會時，晚晚都有大佬嚟捧我場，甚麼水房、十四、勝和等，總之個個見到我都會叫聲大佬……嗰陣時我好怕社團，因為好麻煩，佢哋點邊隻歌就立即要唱邊隻，唔係就會俾人揼。」
就因為尹光堆堆都埋，而且見邊個就靠邊個，即使直至今天，他「廟街歌王」的地位依然鞏固，就像訪問當天，我們行到廟街，便立即有歌迷上前要跟尹光握手，還即席唱他的《十四座》歌呢。
不過，對於別人稱他為「廟街歌王」，他卻不置可否。
「我其實又無喺廟街唱過歌，都唔知點解有咁嘅外號，可能啲歌喺廟街播啦，我唔係想建立呢個形象，只係迫不得已，因為當時（75年）有公司肯幫我出唱片，佢哋話想要一啲搞鬼兼反映現實嘅歌，我梗係仆到去做，你估好易出唱片咩。」
於是尹光便以三千蚊無分紅的代價，為唱片公司出咗一隻名叫《十四座》的唱片，還取得金唱片的成績，銷量達5,000多隻。往後便陸續推出粵語流行曲和粵曲唱片，還接拍電影及電視，撈到盤滿缽滿。
最後他仍是那句：「我想澄清，我所唱和所作嘅歌無一隻係鹹濕，最多係首歌名得意，吸引人去買碟，例如《關人隱士》和《一個黐膠線的少年》，只得個歌名，裏面嘅歌詞真係斯文到你唔信……記着喎，幫我寫吓演唱會嘅嘢喎……」知道喇，月尾個演唱會吖嘛。
原名：呂明光
年齡：50以上
出生地點：越南
來港年份：1970年
第一次登台：1971年
第一次出唱片：1974年《十四座》
第一次上電視：1974年為麗的拍諧趣歌劇
第一次拍電影：1991年《老表發錢寒》
第一次開演唱會：1991年紅館
流行歌曲：《荷里活》、《數波波》、《數毛毛》、《雪姑七友》、《鐵窗雄淚》、《追龍》等