《獅子山下》一經品題，聲價十倍，分分鐘可能重播一兩集畀我哋重溫舊夢。羅文唱嘅主題曲，至今仍有印象，但片集劇情，完全唔記得晒咯，左丁山只係記得一位演員係高魯泉，此君係粵語片著名丑角，非常之有代表性，但《獅子山下》有邊啲其他演員呢？
有人問梁司長：「點解今年冇畀八字真言，寫在預算案封面上，等傳媒有文章可做，去翻查古書，學習學習。」司長笑笑口話：「我讀書唔多。」認真幽默，佢搵黃霑歌詞做結尾，確實反映到佢嘅土生土長文化背景，但又俾人彈為「過時」，想話取悅眾人，真係好艱難。
大記者同左丁山拗，話許冠文兩兄弟嘅《鐵塔凌雲》先至最有香港情懷。據周梁淑怡講，當年（七十年代初）許冠文做節目做得太辛苦，要求放假，周梁淑怡特准佢外遊，但要佢兩兄弟寫一首歌交功課。許冠文遊埠之時，寫下歌詞，由許冠傑譜曲主唱，成為名作。
搵番啲歌詞睇睇，《鐵塔凌雲》其實最啱移民思鄉，難怪九十年代初期有老友移民，上機之後低哼《鐵塔凌雲》，唱唱吓就流眼淚；歌詞內嘅鐵塔凌雲（巴黎）、富士聳峙（日本）、自由神像（紐約）、檀島灘岸（夏威夷），皆反映許冠文遊覽嘅地方，最後思鄉情切，「何須多見復多求，且唱一曲歸途上」，正係「信美非吾土兮，曾何足以少留」，外地風光如畫，終非我鄉也。