羅嘉良同宣萱一向老友鬼鬼，宣萱重係嘉良囝囝嘅契媽，佢兩個早排喺澳洲拍完電視劇《黃金歲月》外景後，早前佢哋又同埋無綫藝員部經理蕭笑鳴（芭姐）及芭姐兩個女，一齊喺山頂餐廳食飯，但嘉良個老婆同埋個仔就因有事冇出現。佢哋一行五人食咗兩個幾鐘，全程有講有笑，又真係幾似一家人。
當晚羅嘉良負責埋單，五個人都係食咗二千蚊左右，走嗰陣宣萱揸住架Audi，而嘉良就揸住部日產離開。馮仁昭所知，羅嘉良同芭姐、梁家樹兩公婆住埋同一幢大廈，所以感情好好，而宣萱加入無綫之後，一直得到梁家樹兩公婆照顧，早已當芭姐係契媽，所以無綫重頭劇《黃金歲月》都搵嘉良同宣萱孭飛。
陳司翰噚日出席保良局賽馬會元朗大棠度假村舉辦嘅「嘉頓梳打餅之尋味歷奇」宣傳活動，問佢對家姐陳慧琳日前出席《梅艷芳─芳華絕代傾情夜》時，同正東負責人黃柏高同場冇打招呼一事，佢話：「佢哋對咗成日，唔會不停sayhi啦。不過，我自己見到黃柏高都會同佢打招呼。」
李司棋噚日擔任「眼明手快全港長者中文電腦輸入擂台比試活動」嘅嘉賓，佢話自己本身唔識得打字，所以都好想去學。司棋姐重話學識咗之後，就可以用e-mail同住喺加拿大嘅囡囡聯絡，咁樣就可以慳番啲長途電話費，而且又可以親自回覆健康網啲網友嘅問題。
林憶蓮噚日下午約兩點鐘喺機場出現，佢話啱啱喺上海返嚟，喺嗰邊除咗要做嘢之外，重要處理一啲私人事務，不過佢話只會逗留幾日。
當記者問佢有關囡囡嘅問題時，憶蓮即刻面色一沉，之後重急急腳咁離開。
容錦昌早前被指精神唔穩定，休息咗一排。噚日佢單拖出現金鐘太古廣場，記者覺得佢肥咗啲，但佢一見記者影相即黑面。於是記者即刻上前問佢身體狀況，容錦昌木無表情咁話：「OK啦！對唔住，唔阻你哋啦！」之後就急急腳走人。
六十年代紅歌手葉楓噚日喺銅鑼灣開記者會，宣布「葉楓與唱家班國語金曲演唱會」將於四月十二日開始喺紅館演出兩場，尤雅、謝雷及黃仲崑等一班國語老歌手都會演出。
葉楓話呢一代嘅歌手，唱得最好係張學友同周華健，而劉德華、張國榮同郭富城亦唱得唔錯。