近排潮流時興玩工業股，小初禮拜日同女友去飲茶，見到靚女經紀擦緊老闆鞋，小初走去打招呼，順便問下有咩貼士，佢哋原來講緊做眼鏡嘅泰興光學（389）。
靚女經紀話，泰興呢排好似好積極，早兩個月出業績時，已經講話喺上海設合營公司，唔排除分拆內地上市。最近又話歐洲嗰邊都好掂，有意分拆德國業務上市，重有泰興近排密密回購股份，睇怕公司都覺得現價平。
以同類眼鏡股比較，雅視光學（1120）同埋新興光學（125）累積升幅已經好大，冇理由泰興股價會唔郁。
靚女經紀又話，上星期五泰興出現兩手交叉盤，計落成2350萬股，同樣做60仙，之後股價就升咗3.2％，收65仙，係近期高位，似係有人做緊嘢。
小初唔敢話泰興唔好，只係過往經驗隻股非常難炒，雖然覺得有人維持秩序，但股價唔多郁，往往揸到悶。