勁Game搶先睇：
星戰遊戲《JediOutcast》　手執Lightsaber劈餐飽

在「2002年最期待遊戲」中榜上有名的《StarWarsJediKnight2:JediOutcast》，發售日期經已逐漸逼近。《JediOutcast》既是第一身射擊遊戲，又可以手執Lightsaber劈劈劈，刺激多變，加上連場《星戰》著名場面，身為《星戰》Fans嘅你，又點可以錯過先？

文：方樂鵬

故事繼承上集劇情
喺上一集入面，主角KyleKatarn由帝國轉投叛軍陣營，更有幸成為絕地武士，可惜最後卻害怕自己會深陷於柔力的黑暗面，毅然放棄絕地武士的路途。事隔數年，Kyle又再一次面對黑暗武士的陰謀，為應付這場宿命對決，Kyle必須通過LukeSkywalker的重重考驗，回復JediKnight的身分和力量，《JediOutcast》的故事亦由此展開。

殺敵方法　勁多變化
《JediOutcast》的基本玩法同上集大致上冇乜分別，但對付敵人方式就有好多變化。舉例說，當你面對着一個StormTrooper，最直接梗係一槍將佢了結，但咁樣做隨時會引起其他敵人注意。所以最佳方法，就係先用Jedi嘅精神力量擾亂對方，然後以原力推移將敵人拉到自己身邊，拔出Lightsaber無聲無息將其消滅。

A.I.聰明曉見機行事
除此之外，遊戲嘅人工智能同樣非常搞嘢，最過癮係敵人好識睇時機行事。當你手執Lightsaber慢慢向敵人逼近，對方將會懾於你的氣勢而嚇窒，眼見隊長被殺更會成Team人鳥獸散；相反在有利情況下，敵人則會各自搵掩護，然後再諗計點樣將你包圍。想親身體驗《星戰》電影嘅著名場面，呢隻Game一定可以完全滿足你。

用Lightsaber變第三身視點
提到電影，相信大家都唔會忘記絕地武士用Lightsaber擋子彈回敬對手嘅伎倆，喺《JediOutcast》入面，玩家終於可以用同樣戰術對付敵人，Lightsaber嘅攻擊同防禦模式亦經過大幅強化，配合原力跳躍和加速，更可使出各種必殺招式。不過為達到最佳效果，使用Lightsaber嘅時候，遊戲將會自動切換到第三身視點，初初玩或者會有少少唔慣。

多款對戰模式
作為一套主打JediKnight嘅Game，多人對戰點都要有番啲特色。遊戲中最特別嘅對戰模式就係「JediMaster」，玩法類似「King-of-the-Hill」，其中一名玩家將會扮演獨行俠，應付所有對手嘅攻擊。而「Holocron」則是以原力作戰的模式，只要玩家成功將對手擊倒，便可吸取對方剩餘的ForcePower加強實力。

發行：LucasArts
售價：約$400
開發：RavenSoftware
預定發售日期：2002年3月28日