自從那個種蘭花的女專家給了我啟示，煮飯就不再那麼枯燥了。
實在佩服師奶們，每天都要想幾個菜出來煮給子女吃。費盡心思煮了出來之後，她們那群沒出息的子女，卻又只懂把餸菜當作薯條，舔茄汁來吃，完全抹殺了師奶的心血。
我說的那個種蘭花女人，與煮飯有甚麼關係？沒有，但她說，她喜歡把每一品種的蘭花，以親戚朋友，或喜歡的人的名字為名。於是，我也有樣學樣，把豬肉牛肉魚蝦蟹蔬菜等，全都以人名代替。
例如，肥豬肉是「任志剛」，排骨是「鄭秀文」，西洋菜是「JenniferLopez」，雞腳是「趙世曾女友」，老鴨是「楊啟彥」，魚蛋是「朱茵」，左口魚是「葉劉淑儀」，豬腦是「董建華」等等。
有了重新命名的材料，每天「諗餸」就好玩得多了。好像，強伯今晨出發往街市買餸時，就這樣諗：
「吖，不如今日煲個JenniferLopez楊啟彥湯啦！不過嗰隻楊啟彥除咗要去油，重起碼要用明火熬足八小時，夜晚至有得飲。
咁晏晝嗰餐，食乜呢？不如簡簡單單，食幾粒朱茵吖，夠彈牙，又唔肥。唔，不過未必夠飽喎，好唔好炆碟鄭秀文呢？但係我又冇乜牙，佢又多骨，都係唔好喇。
吖，差啲唔記得，靚師奶成日話我蠢，咁我好唔好燉盅董建華補吓腦呢？之不過但係，董建華自己咁蠢，又點同人地補腦呀？
算啦，索性買斤任志剛返去，食番肥啲，靚師奶或者會鍾意我呢。嗯，不過任志剛咁肥，我又驚膽固醇過高。
咦，今日啲葉劉淑儀幾新鮮喎，冇翻肚，條條都游水個喎。好，一於買條返去清蒸！」諗餸煮飯，從此好好玩！