做開日本YASHICA（影攝佳）代理嘅永安祥由於終止代理權嘅關係，所以會喺今個星期，一次過將YASHICA各類相機、配件，以清貨價發售。其中更有唔少經典款式，好似主打FX-3機械單鏡機，一機三鏡都唔使$1,600，而用蔡司T*鏡嘅超靚傻瓜機更有特別版平價發售。有興趣學影相同影靚相嘅朋友，不妨睇睇有冇心水選擇。
記者：張穎倫
攝影：林栢鈞
ImageGirl：Vicki
有CONTAX細佬之稱嘅YASHICA，雖然冇CONTAX咁矜貴，但憑住優良質素，一直都有唔少人支持。好似呢部FX-3Super2000機械機配備50mmf1.9超大光圈定焦鏡，拍攝景象極之銳利。機身耐用之餘，更可接駁一眾舊款蔡司鏡（CARLZEISS），極受攝影學生歡迎，所以二手價一直都徘徊喺$1,000左右。𠵱家大減價新機只需$865，比二手價甚至普通傻瓜機更平，絕對令人驚喜。
喺50mmf1.9定焦鏡之下，就算拍攝Slide都一樣咁鮮明，樹葉層次、巴士站文字，全部清晰可見，人像面相亦相當Sharp，唔係一般平價機可比。
型號：YASHICAFX-3Super2000
鏡頭：50mmf1.9（跟機鏡頭）
快門：1-1/2000
拍攝範圍：0.5m-無限遠
街價：約$2,350
清貨價：$865 貨量：150
配件更抵用
除咗部機平之外，鏡頭、閃燈等配件亦一樣平得驚人。而且呢批配件除咗可用喺YASHICA機身外，更可用番喺舊款CONTAX機上，兼容性夠晒大。
易用之選
當年CONTAXT2靚到爆嘅質素，可謂震撼傻瓜機界，但三千幾蚊嘅價位，的確唔係人人買得起。所以後來推出嘅YASHICAT4，一樣大把人捧場，至巴閉當然係採用蔡司T*鏡頭，絕對係鏡頭中嘅經典，比一般冇T*嘅蔡司鏡至少靚多一級。清晰度比唔少單鏡機更靚，另一方面，呢部綠色T4特別版比香港見開嘅黑色普通版更加矜貴，有錢都唔易搵。
型號：YASHICAT4特別版
鏡頭：35mmf3.5
快門：1-1/700
拍攝範圍：0.35m-無限遠
街價：約$1,800
清貨價：$992 貨量：35
自從香港興玩SnapShot之後，定焦鏡又開始大受歡迎，貪佢光圈大過變焦鏡，影出嚟Sharp啲之餘，定焦鏡拍攝步驟又夠簡單，話影就影最易用。好似呢部MinitecP.AF，更用埋32mm鏡頭，比一般38mm傻瓜機Wide一大截，拍攝範圍夠大點影都得。而且更有埋全景拍攝功能，普通家庭最啱用，唯一係近攝只得1.2m算係差啲。
型號：YASHICAMinitecP.AF
鏡頭：32mmf3.5
拍攝範圍：1.2m-無限遠
街價：約$750
清貨價：$422 貨量：15
除咗MINOLTA以前出過一部全景傻瓜機之外，𠵱家都好少呢類機款，所以有興趣純影全景照片的話，呢部機都算抵玩。綠色機身極之搞笑，細細部容易收藏。質素方面亦較一般標準、全景兩用機靚。
型號：YASHICAPanorama-mini
鏡頭：32mmf3.5
快門：1/125、1/60
拍攝範圍：1.2m-無限遠
街價：約$600
清貨價：$320 貨量：200
今次大減價，除咗定焦傻瓜機之外，當然都有變焦機。其中最值得推介就係呢部microtecZOOM。事關唔少變焦傻瓜機最Wide都係得38mm，拍攝效果平平無奇，難得呢部機最Wide有28mm，要影團體照都難佢唔到，又可以ZOOM到50mm，啱晒鍾意ZOOM嘅香港人。
型號：YASHICAmicrotecZOOM
鏡頭：28mmf3.6-50mmf6
拍攝範圍：1m-無限遠
街價：約$880
清貨價：$559 貨量：40
呢部機主打簡單易用，冇乜特別功能，事關用傻瓜機除咗夠Wide之外，又靜又快亦都好重要，特別係閃光燈回電太慢的話，次次等確令人大叫冇癮。另外，如果捲片夠靜又唔怕騷擾其他人，影咗相之後神不知鬼不覺，行街影靚女最啱。
型號：YASHICAminitecAF-D
鏡頭：32mmf3.5
拍攝範圍：1.2m-無限遠
街價：約$500
清貨價：$385 貨量：80
日本YASHICA（影攝佳）係隸屬於KYOCERA（京瓷）旗下一個相機品牌。由於KYOCERA於70年代收購咗西德相機老字號CONTAX，日本與德國相機從而進行技術交流。YASHICA更推出可以接駁世界有名嘅德國蔡司鏡頭機身，呢種日本機用德國鏡嘅突破，令YASHICA更加出名，再加上售價相宜，後來更演變成唔少拍友喺購買CONTAX前嘅入門機種，大受普羅大眾歡迎。
由於呢批相機已經係終止代理嘅關係，所以唔會有免費保養。各位可於購買時試清運作是否正常，例如捲片、閃燈有冇問題。不過呢類機比較耐用，喺香港亦有大量師傅懂得維修，就算有問題都唔怕。
清貨資料：
日期：今日起至3月15日
時間：9:30am-5:30pm
地址：上環永樂街5號永安祥大廈1字樓
電話：25430303