三色台啱啱攞咗英格蘭足總盃嚟播，多咗波睇，對我求大俠等一班球癡，梗係好事啦，不過佢哋班講波佬如果能夠事前做定功課，咁就唔使令到我哋啼笑皆非啦。
其實今屆ESPN台攞咗英超嚟播之後，好多人都好似我求大俠咁，大大話今季都睇咗成百場英超直播，𠵱家香港地好多人都可以話自己係英超專家；而作為現今講波佬，相信我哋要求佢哋專業啲，同埋有獨特嘅分析實在一啲都唔過分。但係三色台前晚播紐記對兵工廠嗰場足總盃八強大戰，對班講波佬嘅水準實在大失所望。
好似佢哋隨口噏話舒利亞好老囉，都有成三十七、八歲（查實三十一歲），跟住又話卜比笠臣今年六十八歲（查實六十九歲），呢一般資料都錯，唔知有冇資料搜集幫佢哋搵料；另外達比薩斯係第一位踢英超嘅希臘外援，咁唔通九六年嗰位布力般球員當尼斯唔係希臘人咩？
講到歷史，重講足總盃係爆冷溫牀，球隊點樣分錢，呢啲相信球迷都覺得係老生常談，何況近幾年超聯球隊實力普遍增強，次級別球隊實在難望爆冷，今屆八強淨得一隊西布朗喺甲組就可以證明呢點；全場兩隊戰術分析不足，只係成日問點解唔出伯金同皮利斯打正選，大佬呀，人哋禮拜二同拉科喺歐冠盃生死戰，唔通會夫添同你砌足總盃咩！
最後希望講波大佬留意，世上暫時冇一隊英超球隊叫做「孟聯」。
臨近季尾，啲歐洲足球員轉會消息就會周圍飛。最近我求大俠就睇到一單爆嘴嘢，話說意甲聯球隊國際米蘭喺上個禮拜二向英超球隊阿仙奴出價一億鎊，要買走佢哋三大主力亨利、皮利斯同埋韋拉。我並唔係質疑國米嘅經濟能力，只係你咁買走「兵工廠」三件主力，咪即係叫人哋散班，就算阿仙奴點貪錢，都唔會咁做啩！
講開贊助，另一英超球會米杜士堡同電訊公司BTCellnet嘅球衣贊助，亦都會喺今屆結束後約滿，佢哋亦積極咁搵新贊助，不過佢哋就話無論點樣，都想將其中一件球衣嘅顏色改做啡色，喚起外界對米杜士堡空氣污染嘅重視。雖然米杜士堡咁重視環保的確抵讚，不過如果佢哋着住件啡色球衣打夜波，咪即係令球迷眼睛受罪？
米字旗國嘅球員不時因為流連夜店，搞到一鑊泡，不過英超球會愛華頓似乎「見過鬼都唔怕黑」，我求大俠收到風，佢哋同電訊公司One-2-One嘅贊助合約喺今屆屆滿後，竟然打算接受默西賽德頂尖夜店Cream嘅贊助。坦白講，接受得贊助，愛華頓嘅球員就自然要喺Cream亮吓相，咁咪即係助長球員蒲夜店嘅風氣？
雖然今屆中國甲A冇咗升降制，啲球會驚少咗球迷入場，搞到又話要減票價又話要減球員人工，不過，佢哋贏波獎金就一啲都冇縮水，重好和味㖭！好似中
巴特爾嚟到NBA除咗可以提升自己嘅技術外，原來重可以學到理財、投資同埋點樣同老婆、女友相處嘅技巧，因為NBA工會不嬲定期開班教授，不過咁大個人重好似細路仔咁上堂就怪啲，睇嚟嗰班「高大威」都係旨在聯誼，邊會留心聽教呀！
喺中國同熊貓一樣被視為國寶嘅王治郅，早排喺小馬頻頻有機會出場，諗住佢開始上位，點知最近又俾人打入冷宮。據我求大俠所知，郅哥嘅風頭俾啱啱加盟小馬嘅拿芬斯搶晒，佢兩個無論身形同技術都屬同一類型，但喺拿芬斯瓣瓣都贏晒，搞到郅哥噚晚對魚腩勇士嗰場波又冇得發市，全場齋坐喺冷板櫈，長此落去真係驚佢隨時連個超級大後備嘅位置都保唔住。