美股杜指上周五升47點，收10572。上周五高位10664，一度突破10600阻力，可惜未能保持至收市，加上9RSI已出現背馳，杜指短期料會出現調整，下試10日線10356至20日線10122支持，須整固後才再展升浪。
港股上周五雖保持升市，但獲利回吐迹象亦明顯，本周初有機會回試50日線（現處10962），提供入市機會。嚴格而言，其實港股現水平並非太過吸引，公布業績後向好嘅滙豐（005），現價PE20.4倍，預測PE17.1倍，估計再升水位唔會太大，不過由於有補空倉效應，及係大戶玩期指嘅主力武器，短線或可繼續企硬，但中線值博率唔高。
左計右計，如果要香港經濟復甦，首先要樓市復甦，睇番近兩年政府嘅措施，其實都係希望谷番旺樓市，因此趙飛雲都係較鍾情地產大藍籌，而新地（016）自然係首選，等佢明日公布埋業績，可伺機追入。
電訊股後市走勢左右港股，趙飛雲雖然唔鍾意中移動（941），但無可否認佢係電訊股嘅首選，近日有關官員表示會注意言論，避免影響股價，其實亦係進步嘅表現。