新任財爺處男下海第一次正正式式交功課畀大家睇，各方面摩拳擦掌，殺氣騰騰準備搵嘢鬧，點知睇完之後發現挑唔到乜嘢骨頭，惟有大呼冇癮。
確實又冇理由成份預算乜嘢都減又或者凍結，話晒都有財赤，點都要搵樣嘢加吓，終於揀咗向葡萄酒開刀。
其實加嗰丁點咁多又幫得幾多？只不過真係鍾意歎靚酒嘅朋友唔會太介意，橫豎屋企大把晨早入定嘅存貨；另外嗰批鍾意將葡萄酒加七喜撞冰嚟「劈」嘅「劈」友，最多咪轉飲啤酒，但求一醉，所謂不大。
新預算案嘅內容唔係最重要，包裝先至最出色，又童年回憶、又《獅子山下》、又剩，加上財爺嘅表現平易近人，用字又不求高深，但求傳真，比起曾司長嘅嚴肅教師面孔嚟得親民得多。不過呢件都係好事，政府兩位高官，一位笑一位唔笑，長短棍，打死人。
關於財政預算的特備節目中，幾間電視台嘅資深記者訪問財爺。
話晒都係「賓架」出身，咩大場面未見過，財爺淡定有錢剩，答得有紋有路，最好嘢嘅係冇乜點帶人遊花園，節奏爽朗絕冇豬油糕，好啱香港人口胃，睇落確係個叻人樣，唔係懶叻樣。
值得一提嘅係當晚幾個電視台嘅資深記者表現得相當出色，一問一答都有質素，令人重新對記者行業肅然起敬。
重有嘅就係幾位記者嘅儀表都有相當質素，尤其係有線電視嗰位男記者，口齒伶俐、有自信，睇睇吓重發覺佢幾靚仔，唔知有冇興趣拍戲？