銅鑼灣街市喺六年前至正式落成，街市只有兩層高，並無熟食檔，規模雖小，檔口唔多，但勝在價錢平，而且地方闊落，樓底高，空氣流通，令人行得好舒服。行完街市內，重可以行埋街市外，即電氣道及水星街交界一帶，亦係街市嘅一部分，部分檔口價錢重好抵㖭！
記者：陳冰麗
攝影：關文慧
室外推介
銅鑼灣街市相隔一條馬路，喺正電氣道同水星街交界就係呢間歷史悠久嘅雜貨舖，銅鑼灣街市未落成已存在，由胡氏夫婦經營至今已有三十多年，賣嘅有乾濕貨品、蔬菜、海味、調味品一應俱全，間中有啲貨品喺街市內都搵唔到㗎！ （新蘭香園 電氣道140A號）
呢種叫高山珠橄欖嘅蔬菜其實即係椰菜仔，平時只有喺大型超市內至搵到，日本出產，超市價通常斷克計，價錢當然唔及呢度咁抵，每包大概有半斤重，只係$5。可以將佢烚熟食或一開二配以肉類炒，清爽而鮮甜。
$5包
濕貨方面，至抵選擇有呢啲香港仔出產嘅魚片，每件重四両，售$4，計落每両$1，抵食。
$4件
五蚊八隻新鮮農場雞蛋亦係一抵買選擇，市價約$0.8至$1隻，農場雞蛋Size雖然較一般雞蛋略細，但蛋味較濃郁。
$5/8隻
新鮮青豆亦唔係常有，呢度就輕易搵到，每包亦只係$5，有14両重，買返去炒飯，滾雜菜湯都抵啦！
$5包
室內推介 1
街市一樓主要賣蔬菜、水果及雜貨，加埋都只有十零檔，而滿記蔬菜已獨佔四個舖位，係呢個街市內一個較大型嘅菜檔，賣嘅蔬菜種類夠多之外，喺呢度重可以率先食到啲夏天至搵到嘅蔬菜，其中包括有青蕹、青豆角、白豆角、苦瓜、枸杞等等！
（滿記蔬菜 20、24、28、29號舖）
蕹菜通常要夏天至容易搵到，多數嚟自大陸，每斤大概$5-$6，呢度見到嘅青蕹係泰國入口貨，每斤需要$7，比本地貨雖然略為貴啲，但勝在質嫩而且可以先食為快。
$7斤
呢度嘅青、白豆角亦係嚟自泰國，皆因本地貨亦非呢個時候當造。鍾意爽口嘅最好揀青豆角，其豆粒細小，肉質較實；相反白豆角豆粒大而粉，肉質較鬆，適宜煮，喜歡腍身嘅口感，食白豆角啱晒。
$10斤
室內推介 2
海鮮、肉類集中喺地下，喺正街市入口近右方去到尾嘅就係呢個海鮮檔，由張氏兩兄妹合力經營，以賣冰鮮海產為主，鮮貨則佔小部分，其中嘅海魚油斑可以話係抵食之選，每斤$88，以下係小記嘅精選抵食推介。 （有記海鮮F3號舖）
呢度嘅魷魚亦係另一抵食選擇，同樣有大細之分，大隻嘅每斤$32，可原隻滷水、切片炒等；細隻每斤$20，釀嘢入內原隻煎、蒸就最和味。
小$20斤 大$32斤
鍾意食魚嘅話，介紹大家食白䱽，有大細條，分別$48斤及$28斤，白䱽肉質幼而味鮮，煎食脆口，蒸則肉質腍滑，可食其鮮味，兩種食法各有風味。
大$48斤 小$28斤
赤米蝦市價一般都要$28斤，呢度只需要$20斤，重係海赤米而非淡水赤米，食落更加好味，檔主張生建議可以剝咗殼後用作炒蛋，鮮味十足。
$20斤