大狀打高球有幾叻？前日三十位律師在清水灣高球鄉村俱樂部參加HongKongWhiteBook高球賽，一顯身手之餘，重籌咗十二萬大元，贊助六個港大法律系學生昨日飛去華盛頓，參加國際模擬法庭辯論賽。
八方偷得浮生半日閒，亦有去呢個居高臨下、睇晒成個西貢無敵靚海景的高球場，欣賞一眾大狀的慈善比賽。八方重有一樣新發現，原來啲律師唔多鍾意入香港球會，反而多數返珠江三角洲啲場玩。香港私人高球場會籍超貴，係人都知，以呢日的清水灣高球鄉村俱樂部為例，公司會籍要二百七十萬，私人會籍都要一百八十萬，年費超過二萬。
不過，對大狀嚟講，錢唔係最重要考慮。港大法律系系主任Johannes（陳文敏）同八方講，咁貴入會，就會局限自己只能「打死」一個場。要知道打高球的人最鍾意新挑戰，每一個場每一個洞都有唔同難度。所以自己每個月幾難都會抽一日去大陸唔同球場過高球癮。
Johannes重替阿松計埋條數，佢估計每日都有過百港人喺大陸打高爾夫球，每人平均消費過千，一個月就係三百萬。如果諗到計將呢筆消費「留港建港」都幾和味。Johannes就獻計，叫財爺將眾多荒廢離島改建為高球場，供應多咗就會平，又可以帶動周邊經濟活動，真係有得諗。
E-mail：