前晚觀音開庫，唔少市民喺經濟不景氣之下，紛紛到觀音廟借庫，就連早前經濟出現問題嘅羅明珠都不例外，前晚，馮仁昭就見到羅明珠同髮型師Boffy，去大坑蓮花宮借庫，佢重借咗四千萬港元。
前晚十一點半左右，羅明珠喺大坑蓮花宮出現，原來，佢為咗唔使排隊，專登叫朋友代勞，馮仁昭問佢觀音借庫借幾多時，佢雖然唔肯多講，但佢身邊朋友就話借四千萬！
黃貫中（阿Paul）同樂隊臨記，前晚喺九龍灣國際展貿中心開音樂會。阿Paul嘅女友朱茵都有捧場。朱茵對於蔡少芬同男友吳奇隆分手一事，佢話：「我點都會支持佢，好多嘢我知，但係唔可以同記者講。」
有傳Glay指霆鋒彈結他唔掂，阿Paul話：「音樂冇話邊個最勁，只係睇一個人嘅誠意，我覺得霆鋒彈結他好努力。」
成功嫁個有錢人嘅女藝人，外表好似好幸福，間中都有同老公一齊去Ball，外界都以為佢哋感情好好。但其實呢個女藝人，近半年識咗個做I.T.嘅男友，成日趁佢老公返咗內地之後就出去偷食，不過佢就好小心，次次約會都分開前後腳到。馮仁昭都唔明，既然咁驚，做乜重要去偷食，上得山多終遇虎！
有一個電波少女出身嘅女藝人，成日話畀人哋聽自己好矜貴，有富豪約佢去遊艇玩，佢都唔去，懶係清高咁。
馮仁昭就試過見到佢半夜三點幾同一個好老嘅男人好親熱咁攬住去一間食肆度食嘢，話佢兩個冇路馮仁昭就點都唔信。
娛樂圈好多女藝人都貪慕虛榮，但呢個女藝人做埋啲咁嘅嘢重要扮晒嘢，馮仁昭就頂佢唔順。
城中一個名人一向好色，而且對妹妹仔特別有興趣。聽講早排佢睇中咗一個十六歲靚女，而呢位靚女因為發明星夢好想靠佢成名，結果同名人發生咗關係，而且重搞大埋個肚。但係個名人畀咗筆錢佢屋企，然後叫佢同父母返加拿大。呢位妹妹因為入娛樂圈夢碎，精神大受打擊。
周身名牌嘅闊太最近因為老公成日去召妓，搞到好冇面，呢輪成日搵律師研究離婚問題，睇吓咁嘅情況下離婚可以得到幾多嘢。
不過，佢老公知道佢想離婚，一早提醒佢唔會得到啲乜嘢，而仔女就一定唔會畀番佢，每個月頂多畀番幾萬蚊贍養費佢過基本生活，但闊太對呢個條件就唔多接受。
馮仁昭知道唔少紅星認為食可卡因可減壓，但呢啲諗法好儍。記得有位半紅不黑嘅已婚影帝都幾多情，有次佢同一位女星拍戲擦出愛火花，兩個人喺一個聚會飲酒、吸食大麻，結果發生埋關係，但第日瞓醒後，已婚影帝都唔記得自己同邊個搞埋一齊。
有一個天王級紅歌星好鬼鍾意去召妓，不過佢好少喺香港搞，因為香港有太多狗仔隊。呢位紅歌星有咁多女fans，所以佢召妓都會好小心，每次都會搵埋啲助手同保安陪佢一齊去，其實馮仁昭都唔係咁明，紅歌星有個咁靚女嘅女朋友都重唔滿足。