雖然港股喺整個二月份嘅走勢唔係好正，不過踏入三月，成個氣氛完全唔同晒，恒指唔單止升穿啲重要平均線，而且重升到去一月份高位，真係好似發夢咁。
今次升得咁急，係因為滙豐（005）公布去年業績之後，不明朗因素一掃而空，加埋美國上周公布嘅經濟數據正到痹，令到班已經極度飢餓嘅「芬佬」都「蒲晒頭」，狂掃幾隻大藍籌股，唔單止將個市愈推愈高，成交額更番返上去80幾90億，就單單一個星期，恒指已經被夾高咗800幾點。
至於早前喺市場上原本睇淡港股，話恒指會跌到8000幾點嘅行家，都紛紛轉睇11800點，實行做吓牆頭草。雖然市場上一地都係跌碎嘅眼鏡，不過喺啲咁正嘅市況下，相信投資者睇到都絕對唔會介意。
港股今次升得咁勁，其實都係全靠美股升得合時。
喺美股上周大發神威下，另一邊廂美元兌日圓嘅滙價就好似食咗瀉藥咁，一個禮拜竟然可以跌5%有多。
日圓之所以大幅咁升值，滙市嘅朋友都話係因為日本3月尾要做年結，班日本仔要將啲海外嘅資金調返日本，所以啲日圓先升得咁有睇頭，不過由於日本嘅經濟數據仍然好差，相信日圓升到呢個水平都已經差唔多。
當美元滙價跌到126日圓嗰日，市場上話要沽日圓嘅投資者大有人在，有好多做外滙嘅朋友亦對伏勝講要追沽日圓，話希望三月底過後，部分日本資金流番出去日本地區時，到時日圓回吐可以賺番筆之外，重話可以將國仇家恨同日本仔一齊算清楚。