證監會收緊證券行做孖展，主要原因係因為小型證券行關門走路之後，啲孖展客受害最深，其中不免有人喊苦喊忽，煩親證監會。為政者最易令自己瞓得安樂嘅方法就係唔俾受害者（證券行）做嘢或做少啲嘢。要證券行收緊或用自己資本嚟做喎，即係斷證券行米路，以後好難捱。
有啲證券行搞網上交易，收效麻麻，一位老友問左丁山點睇前景，左丁山大膽咁話：「一定唔夠銀行嘅網上交易競爭，遲早完，冇大行嘅歷史商譽，點爭呀。」銀行做埋證券，做埋網上交易，非常方便散戶、中戶。一個戶口可以存錢、轉錢、買股票、做孖展、兼夾唔驚銀行走路，試問中小型經紀行點有得揮？銀行做按揭賺唔到大錢，網上證券平台正好補償小部份損失。
唔講唔知，賓架陳話恒生銀行經營網上銀行三四年，鄭大班口口聲聲話免費平台，冇乜賺頭，但靜靜雞咁就執到唔少證券買賣生意，密食當三番之下，直情有資格被列為A組經紀（即生意最多、市場佔有率比較大嘅經紀行，多數係外資大行）。你話再有經紀行執笠發生事故嘅話，恒生銀行嘅網上證券買賣生意更會繼續擴大。
賓架陳嘅消息，支持左丁山嘅睇法，以後嘅證券買賣生意會集中喺大行、銀行同埋三四十間嘅有名有歷史嘅本地證券公司，其他只係捱時間。