美國鹽湖城冬季奧運會已經曲終人散，前排帶香港團去參賽嘅港協會長霍震霆，噚日同八方講起今次經歷，原來有唔少趣事。
霍公子話，今次係香港第一次出席冬運會，佢都係第一次去鹽湖城，到埗先知，原來鹽湖城唔單止係美國最保守嘅城市，重係摩門教嘅基地。話說美國前總統克林頓去睇冬運，鹽湖城市長就以克仔風流成性，生活唔檢點為由唔肯去接機，不過今次就特別宴請香港代表團。霍公子大讚呢位市長都算唔話得！
但係，令霍公子氣頂嘅係，原來呢個世界，重有好多人未知香港回歸之後，同中國係以兩個獨立身分參加奧運，一走埋去就以為佢哋係中國隊，直到見到佢哋身上有香港英文縮寫「HKG」，先知香港冇歸入中國隊。
佢又話，今次香港隊因為人數太少，搞到開幕禮舉旗入場都唔夠人，結果要搵埋個隨團秘書落場，真係有啲失禮。
E-mail：