羅兆輝昨日凌晨離開巴黎前，叫記者代他向嘉玲道歉，並叫嘉玲致電給他。身在巴黎的嘉玲出席浪琴表活動時，她耐心聽完記者轉述羅兆輝的說話後，仍然不肯作出回應。
羅兆輝於香港時間昨日凌晨離開巴黎，在食晚飯時問記者：「你哋聽日係咪會見到嘉玲呀？麻煩你哋幫我問候佢一聲，另外同佢講聲對唔住呀！」記者問羅兆輝對不起劉嘉玲甚麼，他說：「佢明嘅嘞，大家朋友佢知我想講乜嘢嘞！如果你哋見到嘉玲，叫佢打個電話畀我呀！」
而劉嘉玲昨日凌晨出席在巴黎PavillonLeDoyen餐廳舉行的浪琴表七十周年晚會派對，有約二百位中外記者前來採訪，嘉玲身穿張叔平設計的粉紅色旗袍，是五個國家代言人最早到場的一個，她一反平日衣着性感的形象，以較密實的裝束出現，跟印度、意大利的靚女代言人AishwaryaRai和ChiaraMuti的性感裝束相比之下，似乎失色不少。
到場後嘉玲和老闆影完合照，即入去休息室，直至個多鐘頭之後，其餘四位分別代表意大利、印度、美國和俄羅斯的代言人全部到場時，劉嘉玲才步出休息室，影完大合照後才接受記者訪問。
嘉玲耐性地聽完記者轉述羅兆輝的說話，記者問羅兆輝向她道歉，會否接受時，嘉玲說：「我諗我唔會答你呢個問題咯！」
關於羅兆輝的所有問題，嘉玲都不回應，只答有關大會的問題，嘉玲說：「我着旗袍係因為大會要求，其他代言人我喺德國影廣告相時已經見過，我覺得印度代表非常之靚，尤其係對眼，而意大利嘅代表就比較靜，所以少啲傾偈，今次嚟巴黎我都有出去shopping，買咗少少嘢，聽日我會去歐洲玩，唔會返香港住。」
有傳聞指因為羅兆輝在巴黎，大會特別加強保安的人手，並列羅兆輝做不受歡迎人物，對此浪琴表香港區代表市場經理Harry說：「保安有十位，同原先安排一樣，冇因為羅兆輝而加強。但其實所有入場嘉賓都有名單，普通人入唔到嚟。」
劉嘉玲接着離開晚會現場，坐大會安排的Benz離開，返回HotelDeCrillon休息，嘉玲入住的酒店，每晚房租九百歐元（約六千港元）。
本報記者甘比、梁錦貞、何永寧、林德雄巴黎直擊