港股噚日早段重有補倉盤入市掃貨，故曾突破11300水平，升逾143點，其後升幅收窄，似乎大戶補貨行動已完成，後市就要睇美國佬對於加息有幾恐懼喇。
不過，現時美國勞工市場依然呆滯，相信格老暫時都唔畀息口上升，以免阻礙美國經濟復甦。
惠揚控股（231）大股東曾文能於1月份被斬倉，股價低見1.2仙，但復牌後即反彈至４仙以上，然後穩步上揚，主要係新主席及有新投資者希望增持，以取得惠揚控制性股權。
較早時已公布新主席增持至11.98％，但都只係第二大股東，相信有人會繼續收集，進一步控制惠揚，然後才會真正開車。不過，有線人話，有關人士基本上已完全控制惠揚，可以隨時開車。
金澤超分子（8059）將於18日公布業績，有人話今次業績唔會太差，股價現時潛水，可能會有人借業績為藉口，將股價炒上0.50元招股價。此股最近跌至0.30元即見有人收集，似乎下跌風險有限。不過，此股主要生產農藥推進劑，市場前景如何？大家都不易了解。如果公司接唔到大量定單，都幾難吸引到芬佬。
ｉ師傅話，亞洲鋁業（930）有隻公司輪656，將於下個禮拜夠期，行使價0.69元，若悉數行使，公司可集資約6000萬元。正股噚日勁升11.1％，刻意高過認股價0.69元，升至0.70元收市。
不過，要引誘股證持有人行使，相信重要將正股炒高。據聞該公司請咗班財經界人士北上睇廠，相信稍後會有料到。
阿虎