港股好耐都未試過咁威，今個禮拜升足5日，恒指噚日收11233，較上周升808點，升幅7.8%。
恒指上周升破50日線（現處10962），係一個重大轉勢訊號，趙飛雲上周冇急起追貨，主要係估計恒指在急升後會有整固，等待佢回頭與50日線吻別時，才大舉出擊，亦即係話候接近萬一點水平買貨。
此外，趙飛雲亦有一個簡單投資策略，就係確認升破50日線揸張期指，相反跌破50日線就沽張期指，主要係睇中線，唔使驚升市揀錯股，同埋跌市時有機會贏錢，過往效果算唔錯。不過，風險當然比較大，同時要消息靈通兼貼市。
倉內隻太平協和（438）噚日停牌，據講係公司要求停牌，發表一項有關間接收購運盛（上海）實業股權嘅公布，消息同趙飛雲初時聽講嘅有啲出入，如果復牌走勢唔對路，都要先計數，暫以0.67元作止蝕位。向好方面諗，如果股價繼續升，將挑戰0.78元52周高位，到時若見受阻，可先沽一半貨套利。
趙飛雲