總理朱鎔基前日喺北京人民大會堂頒委任狀畀董建華，原來場外有單漏網花絮，八方聽完都要歎句「有冇搞錯」！
係人都知，所有記者入人民大會堂都要過保安檢查，入去見國家領導人當然查得更嚴。話說嗰日當香港記者乖乖排隊等安檢嘅時候，背後突然傳來爭吵聲，有個美聯社記者大大聲鬧負責檢查嘅人員，原來係安檢人員唔俾佢帶一把萬用刀入場。
個美國佬發晒老脾，話自己喺中國做咗採訪工作七年，都未試過唔俾帶刀入場，重大大力拍打部X光機，一於當檢查人員冇到！
帶把刀去見朱總？唔理大定細都唔應該啦！何況美國在「九一一」後，連上飛機帶指甲鉗都唔得，唔通淨係美國可以限制其他人，中國就唔可以有保安規矩﹖旁邊嘅香港行家都好睇唔過眼，最後嗰位美國行家嘈還嘈，始終都係要放低把刀先可以入場採訪。
不過，啲安檢人員又唔係好抵幫，佢哋見到老外就低聲下氣，如果發老脾嘅係香港行家，睇怕一早俾人拉咗囉。
E-mail：