《福布斯》雜誌嘅富豪排名榜，幾有娛樂性。呢類排名榜，估上市公司大股東嘅財富比較容易，譬如話從公開資料之中，查到李嘉誠家族持有幾多股長實、和黃……將股票乘以股價，於是得咗，李嘉誠家財一百億美元，全世界排名第23喎。但係點樣估計冇上市公司嘅半隱形富豪呢？好多資料係完全靠估嘅，私人負債項目、數目又唔知，何來知道某某人嘅家財？
舉例嚟講，《福布斯》講霍英東嘅資產淨值（NetWorth）係十億美元（七十八億港元）排445名，左丁山嘅直覺係少啲喎，霍老自五十年代發達，發咗近五十年，唔止值七十八億港元啩？排413名嘅係何鴻燊，值十一億美元（八十五億八千萬港元），又係低一啲，龔如心都有二十四億美元，何生少佢咁多？
不過聽古無謂駁古，得啖笑就算。人家呢本雜誌嘅主要促銷噱頭就係「富豪排名榜」、明星球星收入榜，每年都因為呢啲排名榜而得到好多廣告（實質收入）或者免費宣傳（無形收入），最過癮嘅就係，無論點樣有錯，一定唔會有人反擊，唔通霍英東、李嘉誠會企出嚟指斥佢哋有錯誤咩！各類型嘅排名榜為傳媒帶來極大好處，冇壞處，所以大家樂此不疲，各自推出唔同方法唔同款嘅排名榜，大家千祈咪睇得太過認真呀。