CAPCOM嘅Game一向都興早出，上次PlayStation2隻《機動戰士GUNDAM聯邦vs.自護DX》早成五日見街，今次隻《鬼武者2》又係一樣，水貨星期六（3月2號）下晝已經有得賣，索價四百六，而且重喺啲旺區先有得賣，一啲冇咁旺嘅地區好似葵芳咁，就一間都冇，重係播緊《Xenosaga》。據本人所知，係因為得幾間大舖知道水貨會早返，所以先至會出現同一個場有人有得賣，有人完全冇嘅現象。但係呢個價錢，亦都唔係維持咗好耐，星期二行貨未到之前，啲舖頭已經好醒目咁將個價錢降番到三百三，梗係啦！行貨又送中文說明書，又有海報，唔減價，又點同人爭呀？而截稿時，價位更跌到二百八，真係低處未算低，未買嘅人就好快啲出手喇！
近排除咗《鬼武者2》大熱之外，早佢兩三日出嘅《Xenosaga》銷售情況亦都十分之理想，但係唔講唔知，今次行貨《Xenosaga》原來有部分出現咗問題，變成有Game冇說明書，搞到買咗嘅人都唔知點算好，後來知道有得換，先至冇咁愁咋，但係對於行貨嘅形象，都咪話唔大影響，SCEH真係要好好留意一下。講開行貨，上次咪呼籲讀者去SONYProShop訂《機戰IMPACT》嘅？最近本人收到風，話行貨嘅限定版會同《Xenosaga》情況差唔多，攞十隻先至得一隻，冇辦法！因為實在唔夠貨派，所以好多地方都唔敢接受限定版訂貨，驚到時冇Game畀人。其實計我話呢，今次限定版只不過係多隻主角機嘅公仔，炒賣潛力應該唔算好高，反而買日本水貨先可以有嘅DVD，就好多人都趨之若鶩，睇嚟有機會妹仔大過主人婆都唔定。
文：打機鐵人