胡楓（修哥）將於本月十四至十六號，喺紅館開三場演唱會。而所邀請嘅嘉賓陣容鼎盛，包括契仔黎明、契女劉美君、Twins同謝霆鋒等，不過修哥嘅好朋友蕭芳芳，就因為耳疾及近日患上哮喘關係，未能出席修哥今次咁難能可貴嘅盛會，所以芳芳姐同修哥日前特別喺紅磡海逸酒店內，錄咗個訪問，安排喺演唱會內播放。
芳芳姐更喺訪問內為修哥大開金口，唱出英文歌《YouAreMySunshine》，芳芳笑住話：「我唱歌咁難聽，係為佢（修哥）我先開金口咋。」修哥對於芳芳姐因健康關係，未能出席而感到可惜，佢話：「大家係老朋友，希望佢健康。」原本係嘉賓之一嘅肥姐沈殿霞，亦因為膽管炎要做手術，會唔會演出仍係未知數，修哥話：「我都未知，不過千祈唔好有事，個個都係好朋友。」
無綫遊戲節目《智在必得》參賽者譚偉文，早前被大會指違規，俾無綫取消佢個參賽資格。譚偉文噚日去咗謝偉俊喺銅鑼灣嘅律師樓開記者會。
謝偉俊話：「佢參賽時精神壓力好大，無意作弊，我哋已經去信無綫，要求佢哋喺七日之內回覆同道歉，否則會保留法律追究嘅權利。」無綫總經理何定鈞噚日回應：「呢件事交咗畀法律部處理，會用合情合理嘅方法處理。」
鄭秀文（Sammi）日前去咗台灣宣傳，接受台灣傳媒訪問時，Sammi竟然話佢嘅心願係租一個冇人嘅小島，跟住喺個島上奔跑。
Sammi又話覺得剃腋毛好煩，重話女性要剃腋毛好唔公平，但又冇能力將露腋毛成為潮流。估唔到Sammi喺台灣都幾肯講嘢，重非！
電影《藍宇》導演關錦鵬，前晚去咗中環皇后戲院，出席同志電影展嘅頒獎禮。大會為咗表揚關錦鵬喺同志電影方面嘅貢獻，特別頒咗個「玲瓏大獎」畀佢。關錦鵬話遲啲會搵鄭秀文拍戲，馮仁昭問佢鄭秀文片酬成五百五十萬咁高，會唔會叫佢減收片酬？點知關錦鵬話鄭秀文鐵價不二，減收片酬真係唔使旨意。
鄭少秋（秋官）、官晶華夫婦同陳寶珠，前晚去咗紅館睇葉德嫻嘅演唱會。秋官同老婆好恩愛，佢哋成日都拍住拖呢度去、嗰度去。前晚佢哋又去咗睇演唱會，當見到記者影相時，秋官同老婆都笑笑口，秋官重揮晒手，鬼咁親民！
跑馬地已經成為藝人嘅蒲點，前晚羅明珠就一個人喺跑馬地出現，當佢見到記者影相嘅時候，佢即刻頭耷耷。記者問羅明珠咁夜去邊度玩？佢話：「我啱啱同阿叔，即係阿爸個細佬食完飯，𠵱家準備去親戚開嗰間bar嗰度返工。」羅明珠同記者傾完偈之後，即刻好快咁走人。